Трампнинг тариф таҳдиди фонида олтин ва кумуш нархлари рекордни янгилади

Бугун, 19 январь куни Гренландия атрофидаги вазият туфайли “хавфсиз бандаргоҳ” активларига бўлган талабнинг ошиши натижасида олтин ва кумуш нархлари янги рекордларни ўрнатди.  

Трейдерлар Гренландияга даъво қилаётган АҚШ Президенти Дональд Трампнинг босими кучайиши АҚШ ва Европа ўртасида кенг кўламли савдо урушини келтириб чиқаришидан хавотирда.  

17 январь куни Трамп февраль ойидан бошлаб Дания ва Гренландияни қўллаб-қувватловчи бир қатор Европа давлатлари учун 10 фоизлик бож жорий этишини эълон қилганди. 2026 йил 1 июндан бошлаб ушбу мамлакатлар учун божлар 25 фоизга етади ва Вашингтон томонидан Гренландияни тўлиқ сотиб олиш бўйича келишувга эришилмагунча амалда қолади.

Еврокомиссия раиси Урсула фон дер Ляйен Европа давлатлари АҚШ божларига мувофиқлаштирилган жавоб беришга тайёр эканлигини билдирди. “Financial Times” газетаси хабар беришича, Европа Иттифоқи мамлакатлари АҚШ товарларига 93 миллиард евро миқдорида божхона тўловларини ёки Америка компаниялари учун бир қатор чекловларни жорий этишни кўриб чиқмоқда.  

Сингапурдаги Saxo Markets бош инвестиция стратеги Чару Чанананинг айтишича, Гренландия билан боғлиқ савдо кескинлиги ўтган йилги АҚШнинг кенг кўламли божлар киритиш вазиятидан фарқ қилади.  

“НАТО ичида тариф таҳдидларидан фойдаланиш ўзига хос ишончга зарба бўлиб, у активлар қийматига нисбатан барқарор хавф мукофотини келтириб чиқариши мумкин”, дейди у.  

Бугун, 19 январь куни Тошкент вақти билан соат 12:30 га келиб, олтиннинг спот нархи 1,6 фоизга кўтарилиб, бир унция учун 4670,47 АҚШ долларига, кумушники эса 3,4 фоизга ошиб, бир унция учун 93,1755 АҚШ долларига етди. Савдо сессияси давомида олтин нархи бир унция учун рекорд даражадаги 4690,59 АҚШ долларигача, кумуш эса бир унция учун 94,1213 АҚШ долларигача кўтарилди.  

“Геосиёсий хатарлар тобора кучайиб бормоқда. Янги савдо ноаниқлиги ўсиш истиқболларини хиралаштирмоқда, АҚШ ташқи сиёсати эса долларга бўлган ишончни заифлаштирмоқда. Бу олтин ва кумуш нархларининг ошиши учун мукаммал шароитлар тўпламидир”, дейди дунёдаги энг жадал ривожланаётган савдо платформаларидан бири бўлган Capital.com Inc. таҳлиличиси. 

АҚШ фонд индекслари бўйича фьючерслар 19 январь куни 0,8-1,3 фоиз пасаймоқда. Фьючерс бозорида савдо фаоллиги суст, чунки Америка биржалари байрам (Мартин Лютер Кинг куни, АҚШнинг федерал байрами – таҳр.) муносабати билан ёпиқ.