АҚШ Гренландиянинг тарафини олаётган мамлакатларга бож жорий этади

АҚШ Президенти Дональд Трамп Гренландия бўйича позицияси сабаб Дания, Норвегия, Швеция, Франция, Германия, Буюк Британия, Нидерландия ва Финляндияга нисбатан божлар жорий этилишини эълон қилди. Бу ҳақда у ўзининг Truth Social ижтимоий тармоғида ёзди.

“2026 йил 1 февралдан бошлаб юқорида санаб ўтилган барча мамлакатлардан АҚШга етказиб бериладиган барча товарларга 10 фоизлик бож солинади”, деб ёзди у.

1 июндан бошлаб тариф 25 фоизгача оширилади ва бож “Гренландиянинг тўлиқ ва якуний тарзда сотиб олиниши”га эришилгунга қадар ундирилади. Трампнинг айтишича, АҚШ санаб ўтилган мамлакатларнинг исталган бири билан орол мақоми бўйича дарҳол музокараларни бошлашга тайёр.

Унинг сўзларига кўра, АҚШ кўп йиллар давомида Дания ва Европа Иттифоқининг барча мамлакатларини улардан ҳеч қандай компенсация олмаган ҳолда субсидиялаб келган. Энди эса улар, гўёки, Гренландияга бўлган унинг даъволарини тўсиб, “хавфли ўйин” ўйнамоқда.

Эслатиб ўтамиз, аввалроқ Дональд Трамп Гренландия устидан Америка назоратини ўрнатиш режаларини қўллаб-қувватламайдиган давлатларга нисбатан савдо божлари жорий этишга тайёр эканини билдиргани ҳақида хабар берилган эди.