Трампнинг ишонган одами лавозимидан “учади”

АҚШ Президенти Дональд Трамп унинг матбуот котиби Каролин Левитт ой охирида Оқ уйни тарк этишини маълум қилди. Бу ҳақда Трамп ўзининг X ижтимоий тармоғидаги саҳифасида ёзиб қолдирди.

Левиттнинг ўзи бу қарорни “аччиқ-ширин қарор” деб атаган. У май ойида иккинчи фарзанди – Вивиана исмли қизини дунёга келтиргач, Оқ уй минбарига қайтган эди. Унинг яна 2 ёшли ўғли бор.

“Қизим туғилгач, Оқ уйга қайтганимдан бери юрагимда 2 нафар ёш фарзандимга муносиб бўлган энг яхши она бўла олмаётганимни ҳис қилдим”, деб ёзган Левитт ўзининг X ижтимоий тармоғидаги саҳифасида.

Дональд Трамп Левиттнинг қарорини тушуниши ва ҳурмат қилишини билдирган. Унинг айтишича, Левитт Оқ уйни тарк этганидан кейин ҳам Трампнинг асосий ташқи маслаҳатчиларидан бири ҳамда Республикачилар партиясидаги таъсирли овозлардан бири бўлиб қолади.

Ҳозирча Трамп унинг ўрнига ким тайинланишини маълум қилмаган.

Маълумот учун, Левитт Трампнинг 2024 йилдаги сайловолди кампаниясига қўшилишидан аввал MAGA Inc. Super PAC ташкилотида матбуот котиби бўлиб ишлаган. 2022 йилда Нью-Гэмпшир штатидан Конгрессга сайланиш учун номзодини қўйиб, Республикачилар партиясидаги 10 номзод иштирок этган праймеризда ғалаба қозонган. Бироқ умумий сайловда Демократлар партияси вакили Крис Паппасга ютқазган.

У Трампнинг биринчи президентлик даврида ҳам Оқ уй матбуот хизматида ишлаган, кейинчалик республикачилар конгрессмени Элиз Стефаникнинг коммуникациялар бўйича директори бўлган.

Левитт 2025 йилда Трампнинг иккинчи президентлик муддати бошида Оқ уй матбуот котиби этиб тайинланган ва бу лавозимни эгаллаган энг ёш шахс бўлган.

Эслатиб ўтамиз, аввалроқ Америка Президенти Дональд Трамп учинчи муддатга АҚШ Президенти лавозимига номзодини қўйишни хоҳлашини айтган эди.