Трампнинг БМТ минбаридаги нутқи муаммо билан бошланди (видео)

Бугун, 23 сентябрь куни АҚШ Президенти Дональд Трамп БМТ Бош Ассамблеясида нутқ сўзлаш учун минбарга чиқди. Шу пайтда телесуфлёр ишламай қолди ва Трамп бунга масъул шахс “катта муаммога дуч келишини” айтди. Жараён БМТнинг You Tube’даги саҳифасида жонли намойиш этилди.

“Мен телесуфлёрсиз нутқ сўзлашга қарши эмасман, чунки у ишламаяпти. Шунга қарамай, сизлар билан бу ерда турганимдан жуда хурсандман… фақат шуни айтишим мумкинки, телесуфлёрга масъул шахс катта муаммога дуч келади”, дейди АҚШ Президенти.

Трамп БМТ Бош Ассамблеяси минбаридан туриб, ўзининг биринчи президентлик муддати даврида эришилган тинчлик “қулаганини” ва унинг ўрнини “катта инқирозлар” эгаллаганини айтди.

“Мен бу улуғ залда охирги марта турганимга олти йил бўлди. Ўша пайтда дунё фаровон ва тинч эди. Менинг биринчи президентлик муддатимда ўрнатилган тинчлик икки қитъада ҳукм сурди. Аммо ўша кундан буён уруш қуроллари мен ўрнатган тинчликни вайрон қилди, осойишталик ва барқарорлик даври эса замонамизнинг энг катта инқироз даврига алмашди”, дейди Трамп.

Унинг таъкидлашича, АҚШ “собиқ президент Жо Байден даврида тўрт йил давом этган радикализм ва заифлик”ни бошдан кечирган, аммо ҳозир мамлакат “дунёда ҳеч қандай рақобатчиси бўлмаган” даражага чиққан.

“Бизнинг мамлакатимиз сўнгги маъмурият даврида тўрт йил давомида қонунсизлик, заифлик ва радикализмни бошидан кечирди. Бу эса бизни қатор фалокатларга олиб келди. Ўтган йили биз катта муаммоларга дуч келган эдик, аммо ҳозир менинг маъмуриятим туфайли АҚШ дунёнинг энг қудратли мамлакатларидан бирига айланди. Биз билан таққосланадиган бошқа давлат йўқ”, дейди Трамп.

Шунингдек, у Байден президентлиги даврида АҚШ устидан бутун дунё масхара қилганини айтиб, ҳозир эса мамлакат “ҳеч қачон бўлмагандек ҳурмат қозонганини” таъкидлаган.

“Фақат бир йил, икки йил, уч йил ёки тўрт йил аввал биз бутун дунё учун масхара бўлгандик. Бугун эса Америка ҳеч қачон бўлмагандек ҳурмат қозонмоқда”, дейди у БМТ Бош Ассамблеясида.

Эслатиб ўтамиз, аввалроқ Туркия Президенти Ражаб Тойиб Эрдўған БМТ доирасида ўтказилган “Фаластин масаласига ечим топиш ва икки давлатли ечимни амалга ошириш” мавзусидаги халқаро конференциядаги чиқишида Ғазодаги ҳаракатлари учун Исроилни қоралай бошлаган пайтда унинг микрофони ўчириб қўйилгани ҳақида хабар берилган эди.