Трамп Венесуэлага еттита ҳарбий кема юборди – “Axios”

Кеча, 29 август куни АҚШ ҳарбий-денгиз кучлари еттита кемани “наркотрафикка қарши кенгайтирилган операция” доирасида Кариб ҳавзасининг жанубий қисмига – Венесуэла яқинига юборди. Бу ҳақда АҚШ Мудофаа вазирлиги вакилига таяниб, “Axios” хабар берди.

“Axios” ўз манбаларига таяниб, кемаларнинг сони еттита эканини ёзмоқда. Жумладан, учта эсминец ва камида битта зарба берувчи сувости кемаси бор. “The Washington Post” нашри маълумотларига кўра, флот таркибига 8 та кема – учта эсминец, иккита десант кемаси, десант вертолёт ташувчи, крейсер ва қирғоқбўйи жанговар кемаси киради. Кемаларнинг бир қисми аллақачон минтақада жойлашган, бир қисми эса у ёққа кетмоқда.

АҚШ денгиз кучлари кемалар аниқ қаерда ҳаракат қилиши ҳақида аниқлик киритмаган. “The Washington Post” манбасининг айтишича, эсминецлар “тўғридан тўғри Венесуэла қирғоқлари ёнида” жойлашмаган. Улардан иккитаси Кариб денгизининг шарқий қисмида, яна бири эса Тинч океанида Панама қирғоқлари яқинида ўрнашган.

Эсминецларда АҚШ Соҳил қўриқчилари бўлинмалари ва ҳуқуқни муҳофаза қилиш органлари ходимлари жойлаштирилган бўлиб, улар Лотин Америкасида наркокартелларни қўлга олиш бўйича миссиялар ўтказишда қатнашади. “Axios” ва “Reuters” маълумотларига кўра, кемаларда 4500 нафар ҳарбий хизматчи бор, жумладан, 2200 денгиз пиёдалари.

“Reuters”нинг қайд этишича, кучларнинг бу даражада тўпланиши минтақадаги одатдаги жойлаштиришдан анча юқори. Венесуэла жорий йилнинг 28 август куни АҚШ ҳарбий-денгиз кучларининг кучайтирилишига қарши БМТ Бош котиби Антониу Гутерришга шикоят қилган ва кемалар жойлаштирилишини “ҳарбий аралашувни оқлаш учун кенг кўламли тарғибот операцияси” деб атаган.

Маълумот учун, 2024 йилда Венесуэлада сайловлар бўлиб ўтди. Уларнинг якунига кўра Миллий сайлов кенгаши 2013 йилдан бери ҳокимиятда бўлган Николас Мадурони ғолиб деб эълон қилди. Венесуэла мухолифати эса аксинча, сайловчиларнинг кўпчилиги Эдмундо Гонсалесни қўллаганини таъкидламоқда. АҚШ сайлов натижаларини тан олмади ва Мадурони қонуний президент деб ҳисобламайди. Унга ва айрим юқори мартабали венесуэлалик амалдорларга АҚШда пул ювиш ва наркотик контрабандаси бўйича жиноий ишлар очилган. Хусусан, жорий йилнинг июль ойида АҚШ Молия вазирлиги Мадурони Венесуэланинг “Cá de los Soles” картелига раҳбарлик қилганликда айблади ва бу гуруҳни террорчилик ташкилоти деб тан олди.

Икки мамлакат ўртасидаги инқироз Дональд Трампнинг иккинчи муддатга қайтиши ва унинг депортация сиёсати билан янада кескинлашди. 2025 йил март ойида АҚШдан юзлаб мигрантлар депортация қилинди, уларнинг катта қисми Венесуэла фуқаролари эди. Трамп администрацияси уларни Венесуэланинг “Трен-де-Арагуа” тўдаси аъзолари деб эълон қилди. Февраль ойидан буён жами қарийб саккиз минг венесуэлалик АҚШдан депортация қилинган.

Эслатиб ўтамиз, аввалроқ CNN Пентагондаги манбаларга таяниб АҚШ Қуролли кучлари Лотин Америкаси ва Кариб денгизи сувларига наркокартелларга қарши курашиш учун 4 мингдан ортиқ денгиз пиёдаси ва ҳарбий денгизчиларни жўнатаётганини хабар қилган эди.