Трамп Венесуэла президенти бўлмоқчилигини айтди (видео)

north_east

Мадуро иши бўйича иккинчи суд мажлиси якунланди

АҚШ Президенти Дональд Трамп Эрон билан боғлиқ можаро тугагач, испан тилини ўрганиб, Венесуэла президенти лавозими учун курашиб кўришини маълум қилди. Бу ҳақда у  C-Span томонидан эълон қилинган матбуот анжуманида айтиб ўтган.

“Буни тугатганимдан кейин Венесуэлага боришим мумкин. Мен тезда испан тилини ўрганаман. Мен Венесуэлага бораман. Президентликка номзод бўламан”, деган Оқ уй етакчиси.

Унинг таъкидлашича, ўзининг ноёб қобилиятлари туфайли у учун испан тилини ўрганиш кўп вақт олмайди.

Вашингтон ва Венесуэланинг янги ҳукумати

Жорий йил бошида АҚШ Венесуэлада ҳарбий операция ўтказди. Мамлакат президенти Николас Мадуро 3 январь куни Каракасда Америка махсус кучлари томонидан қўлга олинди ва АҚШга олиб кетилди. Шундан сўнг, президент вазифасини илгари вице-президент лавозимида ишлаган Делси Родригес бажара бошлади. У Вашингтон босими остида сиёсий маҳбусларни қамоқхоналардан озод қилишга киришди. Родригес, шунингдек, фойдали қазилмалар тўғрисидаги қонунларни ўзгартириб, Венесуэланинг нефть секторини хорижий инвестициялар учун очиб берди. 24 февраль куни Трамп АҚШ ўзининг “янги дўсти ва ҳамкори” Венесуэладан тахминан 89 миллион баррель нефть олганини эълон қилди.

27 февраль куни Родригес Трампни ўз мамлакатига қўйилган санкцияларни бекор қилишга ва Венесуэла нефти блокадасини тўхтатишга чақирди. У Мадуро ағдарилганига қарамай, мамлакатларни бир-бирига “дўстона” деб ҳисоблашини таъкидлади. Унинг сўзларига кўра, Каракасдаги ҳукумат Вашингтон билан “ҳамкорликнинг янги кун тартибини очишга” интилмоқда.

АҚШ Давлат департаменти 5 март куни Венесуэланинг муваққат ҳокимияти билан дипломатик муносабатларни тиклаш бўйича келишувга эришилганини эълон қилди. Марко Рубио бошчилигидаги идора Қўшма Штатлар Венесуэла халқига “тинч йўл билан демократик сайланган ҳукуматга ўтиш учун шароит яратувчи босқичма-босқич жараён” доирасида ёрдам беришда давом этишига ваъда берди.