Трамп Венесуэла ҳаво ҳудуди очилишини айтди

Кеча, 29 январь куни АҚШ Президенти Дональд Трамп Венесуэла ҳаво ҳудуди яқин вақт ичида очилишини маълум қилди. Бу ҳақда у матбуот анжуманида айтиб ўтди. Анжуман Оқ уйнинг YouTube каналида жонли эфирда намойиш этилди.

Трампнинг сўзларига кўра, у Венесуэланинг вақтинча раҳбари ҳисобланган Делси Родригес билан телефон орқали суҳбатлашган ва унга АҚШ Венесуэла устидаги барча тижорий парвозлар учун ҳаво ҳудудини очмоқчи эканини билдирган.

“Мен ҳозиргина Венесуэла етакчиси билан гаплашдим ва унга Венесуэла устидаги барча тижорий ҳаво ҳудудини очиш ниятимиз борлигини айтдим”, деган Трамп.

АҚШ Президенти, шунингдек, яқин вақт ичида америкаликлар Венесуэлага бориши ва ўзини хавфсиз ҳис қилиши мумкинлигини айтди.

Қайд этиш жоиз, Трамп Венесуэла устидаги ҳаво ҳудудини 2025 йилнинг ноябрь ойида ёпган эди. Шундан олдин, ўша ойда АҚШ авиакомпанияларига 2025 йил 21 ноябрдан 2026 йил 19 февралгача Венесуэла устидан парвозларда эҳтиёт бўлиш тавсия қилинган.

2026 йилнинг 3 январида АҚШ Каракасда ҳарбий операция ўтказди. Ушбу операция давомида Венесуэла Президенти Николас Мадуро ва унинг рафиқаси Силия Флорес қўлга олиниб, мамлакатдан олиб чиқиб кетилди. Кейинчалик улар АҚШ ҳудудида суд олдида жавоб берди.

Эслатиб ўтамиз, аввалроқ АҚШ Давлат котиби Марко Рубио Сенатнинг халқаро муносабатлар бўйича қўмитасидаги эшитувда АҚШ ҳукумати Венесуэла раҳбариятидан “максимал даражада ҳамкорлик”ни таъминлаш учун, агар бошқа усуллар самара бермаса, куч ишлатишга тайёрлигини айтганди.