Трамп ва унинг оиласи устидан тергов бошланиши мумкин

Агар 2026 йилги оралиқ сайловларида АҚШ Конгрессининг бирор бир палатасида Демократик партия кўпчилик ўринни қўлга киритса, Президент Дональд Трамп ва унинг оиласига нисбатан тергов ўтказилади. Бу ҳақда конгресс аъзоси Жасмин Крокетт “Breitbart”га берган интервьюсида сўз очди.

Конгресс аъзосининг сўзларига кўра, Трамп ўз ҳаракатлари билан конституцияни бузган бўлиши мумкин.

“Агар якунда Вакиллар палатаси қўлга киритилса – бу мен кутаётган натижа бўлади. Биз Сенатдаги демократ ҳамкасбларимизни қўллаб-қувватлаб, жиддий ҳаракат қиламиз. Биз тергов бошлаймиз. Шуни ҳам қўшиб ўтмоқчиманки, бизда кўриб чиқилиши керак бўлган кўплаб масалалар бор. Биз нафақат қонун бузилиши, балки конституциянинг бузилган ёки бузилмаганини ҳам аниқлашимиз керак бўлади”, деган Крокетт.

Унинг таъкидлашича, демократлар Трамп Қатарнинг қироллик оиласидан “Boeing 747 самолёти каби қимматбаҳо совғани қабул қилиш орқали қонунни бузганми-йўқми” деган масалани аниқламоқчи. Шунингдек, АҚШ маъмурияти томонидан айни пайтда тузилаётган барча бизнес битимлар юзасидан ҳам тергов олиб борилиши режалаштирилган.

Эслатиб ўтамиз, аввалроқ АҚШ Президенти Дональд Трампнинг туғилганлик ҳуқуқи асосида фуқаролик беришни чеклаш ҳақидаги фармонига қарши 22 штат судга мурожаат қилганди. Даъвогарларнинг таъкидлашича, Президентнинг бу қарори АҚШ конституциясининг 1868 йилда ратификация қилинган ва 100 йилдан ортиқ вақт давомида Америка судлари томонидан изоҳланган 14-тузатмасига зид.