Трамп ўзига қарши бош кўтарган Лос-Анжелесга денгиз пиёдаларини юборди

АҚШ федерал ҳукумати иммиграцияга қарши рейдларга қарши норозилик намойишлари фонида Лос-Анжелесда ўз назорати остидаги Миллий гвардия қўшинлари сонини икки баробарга, яъни 4000 кишига етказишга қарор қилди. Бу ҳақда кеча, 9 июнь куни Калифорния губернатори Гэвин Ньюсом Х ижтимоий тармоғида маълум қилди.

Миллий гвардиянинг янги бўлинмаларидан ташқари Калифорниядаги Кэмп Пендлтон базасидан 700 нафар денгиз пиёдалари ҳам Лос-Анжелесга юборилади. АҚШ Президенти маъмурияти бу қарорни “федерал ходимлар ва биноларга таҳдидларнинг кучайиши” билан оқлади.

АҚШ Президенти Дональд Трамп Лос-Анжелесда давом этаётган норозилик намойишларини шарҳлар экан, “профессионал агитаторлар ва исёнчиларни” тартибсизликлар келтириб чиқаришда айблади. У Калифорнияга маҳаллий ҳокимиятларга эмас, балки федерал марказга ҳисобот берадиган хавфсизлик агентликларининг янада кўпроқ вакилларини юбориш билан таҳдид қилди.

Шунингдек, у Truth Social ижтимоий тармоғидаги постида ўзи юборган аскарларга “ҳурматсизлик” кўрсатадиган намойишчиларга нисбатан зўравонлик билан таҳдид қилди.

Калифорния губернатори ва Демократик партия аъзоси Гэвин Ньюсом Трампнинг Лос-Анжелесдаги норозилик намойишларини бостириш учун денгиз пиёдаларидан фойдаланиш ҳақидаги қарорини “Америкага зид” деб атади.

“Бундай бўлинмалар мамлакат ичида эмас, балки ташқи таҳдидларга қарши курашиши керак. Уларни Америка тупроғига ўз фуқаролари билан жанг қилиш учун жўнатмаслик керак”, деб ҳисоблайди Ньюсом.

Шу билан бирга, Калифорния губернатори Трампни судга беришга ваъда берди. Америка қонунчилигига кўра, федерал назорат остидаги хавфсизлик кучларини тартибсизликларга қарши курашда ёки фавқулодда вазият юзага келганда жалб қилиш учун штат расмийларининг ўзлари Вашингтонга тегишли сўров юборишлари керак. Истиснолар ташқаридан бостириб кириш ёки давлат тизимига таҳдиддир. Бошқа ҳолларда, Миллий гвардия бўлинмалари маҳаллий ҳокимиятлар назорати остида.

“Трамп Калифорниядаги тартибсизликлар фонида бир томонлама тартибда Миллий гвардияни ўз қўмондонлиги остига ўтказиш тўғрисидаги буйруқни қабул қилди – буни оқлайдиган таҳдидлар бўлмаганида”, дея таъкидлади Ньюсом.

Шунингдек, у имзоланган буйруқ Калифорния билан чекланиб қолмаслиги ва шунга ўхшаш ҳаракатларни АҚШнинг исталган штатида ўтказиш имконини беришига эътибор қаратди.

Лос-Анжелесдаги норозилик намойишлари 7 июнь куни шаҳарда ноқонуний муҳожирларга қарши ICE рейдлари ўтказилгандан кейин бошланди. Бир ҳафта давомида Лос-Анжелес ҳудудида иммиграция қонунчилигини бузганликда гумон қилиниб, 118 киши ҳибсга олинди. Ҳодисалар чоғида хавфсизлик кучлари кўздан ёш оқизувчи газ ва гранаталардан фойдаланган.

Трамп маҳаллий ҳукуматлар вазиятни “одатдагидек” ҳал қила олмаётганини айтди ва Калифорнияга Миллий гвардиянинг 2000 аскарини юборишни буюрди. Миллий гвардия аввалроқ 2020 йилда афро-америкалик Жорж Флойднинг полиция ҳаракатлари оқибатида ўлим топгани туфайли юзага келган тартибсизликлар муносабати билан Калифорнияга юборилган эди.