Трамп Украинага қурол юборишга ваъда берди

АҚШ Президенти Дональд Трамп кеча, 7 июль куни кечқурун АҚШ Украинага кўпроқ, асосан мудофаа қуролларини етказиб беришини айтди. Бу ҳақда у Оқ уйда Исроил Бош вазири Биньямин Нетаньяху билан кечки овқат пайтида маълум қилди.

“Биз буни қилишимиз керак. Улар ўзларини ҳимоя қила олишлари керак. Уларга ҳозир жуда қаттиқ зарба бериляпти”, деди Америка Президенти.

Трамп, шунингдек, 3 июль куни Россия Президенти Владимир Путин билан бўлиб ўтган телефон суҳбати натижаларидан норози эканини яна бир бор таъкидлади.

“У охиригача боришни хоҳлайди, шунчаки одамларни ўлдиришда давом этиш ёмон”, деди АҚШ Президенти.

Шундан сўнг, Россия қўшинлари бир кечада Украинага рекорд миқдордаги ракета ва дронларни учирди – 550 та.

“Вашингтон Трампнинг махсус вакили Кит Келлогг ва Украина Мудофаа вазири Рустам Умаров ўртасидаги икки учрашувдан сўнг Киевга Америка ҳарбий ёрдамининг бир қисмини етказиб беришни қайта бошлаши мумкин”, деб ёзди “Politico” манбаларига таяниб.

Манбаларга кўра, уларнинг биринчи учрашуви 10-11 июль кунлари Римда, иккинчиси эса бир неча кундан кейин Киевда бўлиб ўтадиган Украинани қайта тиклаш бўйича халқаро конференцияда режалаштирилган.