Трамп Украинада тинчлик қачон ўрнатилишини айтди

АҚШ Президенти Дональд Трамп Украинада ўт очишни тўхтатиш “тез орада” тўхташи ёки тинчлик “ҳеч қачон” ўрнатилмаслигини айтди. Бу ҳақда у кеча, 27 февраль куни Буюк Британия Бош вазири Кир Стармер билан учрашувда сўз очди.

Америка етакчисининг сўзларига кўра, “тинчлик сари олға силжиш” бугун, 28 февраль куни у украиналик мавқедоши Владимир Зеленский билан минерал ресурслар бўйича келишув имзоламоқчи бўлган учрашувда давом этади.

Журналистнинг Россия Президенти Владимир Путинга ишониш мумкинми деган саволига Трамп “ишон, лекин текшир” деган мақол билан жавоб берди. Шу билан бирга, АҚШ Президенти, ўз сўзларига кўра, Путин, агар у Киев билан тинчлик шартномаси тузса, уни бузади ва яна Украинага бостириб киради, деб “ўйламайди”.

Шунингдек, Трампдан Украинага европалик “тинчликпарвар кучлар”нинг юборилиши НАТО шартномасининг 5-моддасини ишга солиши мумкинлигидан қўрқадими, деб сўралди. Ушбу модда альянснинг бир аъзоси ҳужумга учраган тақдирда, барча аъзолар  унга ёрдам беришини талаб қилади.

“Менимча, бизда бунга ҳеч қандай сабаб бўлмайди”, деб жавоб берди Америка раҳбари.

Унинг қўшимча қилишича, у ушбу моддада қайд этилган НАТОнинг жамоавий мудофаа тамойилини бутунлай қўллаб-қувватлайди.

Трамп Украинада потенциал тинчликпарварлик миссияси тафсилотларини муҳокама қилишдан бош тортди ва аввало Москва ҳамда Киев ўртасида тинчлик келишувига эришмоқчи эканини айтди.

Эслатиб ўтамиз, кеча, 27 февраль куни Буюк Британия Бош вазири Кир Стармер Трамп билан Оқ уйдаги учрашувда Украинада тинчликни сақлаш учун қўшин ва самолётлар юборишга тайёрлигини билдирганди.