Трамп Туркияга туалети билан келди

АҚШ Президенти Дональд Трамп Анқарадаги НАТО саммитига мингга яқин кишидан иборат хавфсизлик ва хизмат гуруҳи, тахминан 9-10 тонна оғирликдаги “The Beast” зирҳли автомобили ҳамда ўзининг шахсий туалети билан келди.

Трампнинг хавфсизлик гуруҳи таркибида АҚШ Махфий хизмати, дипломатик хавфсизлик ходимлари, Оқ уй вакиллари, ҳарбийлар, разведка ва техник мутахассислар бор. Президентнинг шахсий хизмат автомобиллари орасида дунёдаги энг ҳимояланган лимузинлардан бири сифатида танилган “The Beast” ҳам Анқарага етказилган.

Тахминан 9–10 тонна оғирликдаги ушбу зирҳли автомобиль кучли портлашлар, ракета ҳужумлари ҳамда турли хавф-хатарларга қарши ҳимоя тизимлари билан жиҳозланган. Автомобилнинг зирҳли эшиклари тахминан 20 сантиметр қалинликда бўлиб, самолёт эшиклари даражасидаги ҳимояни таъминлайди.

Бундан ташқари, Трамп билан бирга олиб келинган махсус туалет ҳам алоҳида эътиборни тортмоқда. АҚШ хорижий ташрифларида бундай амалиёт хавфсизлик сабабларидан келиб чиқиб қўлланилади. Чунки бошқа давлатлар разведкаси, Трампнинг биологик намуналари орқали унинг соғлиғи ёки тиббий ҳолати ҳақида маълумот олиш мумкин.

Шунингдек, Трамп Анқарага Қатар томонидан совға қилинган, қиймати 500 миллион долларга баҳоланадиган улкан Boeing самолётида келган. Президент фойдаланадиган ушбу ҳаво кемаси оддий самолёт эмас, балки замонавий алоқа маркази, илғор мудофаа тизимлари ва махсус жиҳозларга эга “учувчи штаб” ҳисобланади. Унинг ичида президент учун алоҳида ётоқхона, меҳмонларни қабул қилиш учун люкс хоналар, йиғилиш заллари ҳамда зарурат туғилганда парвоз давомида ҳам давлат бошқарувини олиб бориш имконини берувчи махсус алоқа тизимлари мавжуд.

Эслатиб ўтамиз, аввалроқ Дональд Трамп НАТО саммити доирасида Россия–Украина уруши бўйича Владимир Путин ва Владимир Зеленский билан мулоқот қилганини маълум қилиб, можарони дипломатик йўл билан ҳал қилиш имконияти сақланиб қолаётганини билдирган эди.