Трамп Сурияни террорчи давлатлар рўйхатидан чиқармоқчи

АҚШ Президенти Дональд Трамп кеча, 8 июль куни Сурия Президенти Аҳмад аш-Шараага мамлакатни АҚШнинг терроризмни қўллаб-қувватловчи давлатлар рўйхатидан чиқаришга қарор қилганини айтди. Бу ҳақда Трампнинг НАТОнинг Анқарадаги саммити доирасида Сурия Президенти Аҳмад аш-Шараа билан учрашувдан сўнг Шараага алоҳида жўнатган хатида баён қилинган.

«Мен мамлакатингизни қайта тиклашга тўсқинлик қилаётган барча тўсиқларни олиб ташлашга ваъда берган эдим ва жуда яқин вақт ичида сиз ниҳоят буни амалга ошира оласиз. Бизда Сурияга сармоя киритишга тайёр турган америкалик компаниялар бор ва улар мамлакатингизни ҳар қачонгидан ҳам буюкроқ ва фаровонроқ қилишга ёрдам беради”, деб ёзган Трамп.

АҚШ маъмуриятининг юқори лавозимли амалдорларидан бирига кўра, мазкур мактуб Трамп ва аш-Шараанинг 8 июль куни Анқарада бўлиб ўтган учрашувидан сўнг Сурия раҳбарига топширилган.

Трамп бу қарор ҳақида Конгрессни ҳам хабардор қилганини айтган. Энди қарор кучга киришидан олдин Конгресс уни 45 кун давомида кўриб чиқади. Терроризмни қўллаб-қувватловчи давлат мақоми АҚШнинг ташқи ёрдами, мудофаа маҳсулотлари экспорти ҳамда айрим молиявий операцияларга чекловларни назарда тутади.

Сурия Марказий банки раиси Сафват Раслан Telegram орқали АҚШнинг бу қарори инвестициялар жалб этиш, иқтисодий тикланиш ва Суриянинг жаҳон иқтисодиётига қайта интеграция қилиниши учун кенг имкониятлар очишини билдирган.

Ўтган йили Трамп Сурияга қарши АҚШ санкциялар дастурини бекор қилувчи фармонни имзолаган эди. Бу мамлакатнинг халқаро молия тизимидан яккалаб қўйилишига барҳам бериш имконини яратди.

Шунингдек, Саудия Арабистонининг бир нечта компанияси Сурия иқтисодиётини тиклаш доирасида миллиардлаб долларлик сармоя киритишни режалаштирмоқда. Форс кўрфази минтақасидаги бошқа давлатлар ҳам молиявий ёрдам кўрсатишга ваъда берган.

Трамп 8 июль куни Аҳмад аш-Шараа ҳақида ҳам илиқ фикр билдирган. Аш-Шараа 2016 йилгача Суриядаги “Ан-Нусра фронти” қўмондони бўлган, кейин эса ушбу гуруҳ билан алоқаларини узган. 2024 йил охирида у исёнчи гуруҳлар коалициясига бошчилик қилиб, Башар Асад ҳокимиятини ағдарган.

Трамп аш-Шараанинг минтақадаги “Ислом давлати” террорчилик гуруҳига қарши ҳаракатларини қўллаб-қувватлаётганини билдирган.

“Уни ҳамма ҳурмат қилади, жумладан мен ҳам”, деган Трамп.

Эслатиб ўтамиз, Франция Президенти Эммануэль Макрон ҳам 6 июль куни Сурияга ташриф буюрган эди. Бу 2024 йилда Президент Аҳмад аш-Шараа бошчилигидаги исёнчилар Башар Асад ҳокимиятини ағдарганидан буён Европа Иттифоқи давлат раҳбарининг Дамашққа илк ташрифи бўлганди.