Трамп Россияга қарши чора кўришни кўриб чиқяпти – WSJ
Олам
−
27 Май 4190 3 дақиқа
АҚШ Президенти Дональд Трамп Украинада ўт очишни тўхтатишга эришилган муваффақиятсиз уринишдан сўнг шу ҳафтанинг бошида Россияга қарши янги санкциялар киритиш имкониятини кўриб чиқмоқда. Бу ҳақда кеча, 26 май куни Трампга яқин манбаларига таяниб, Американинг “The Wall Street Journal” (WSJ) газетаси хабар берди.
Уларнинг сўзларига кўра, Оқ уй раҳбари Россия Президенти Владимир Путин томонидан Украинага қарши давом этаётган ҳужумлар, шунингдек, музокаралар жараёнининг сустлигидан тобора кўпроқ норози бўлмоқда.
Нашр манбаларидан бирининг айтишича, янги чекловлар Россия банк секторига қарши чораларни ўз ичига олмайди. Шу билан бирга, Путинни музокаралар столида ён беришлари учун босим ўтказишнинг бошқа вариантлари, жумладан, Украина расмийлари томонидан қўллаб-қувватланган 30 кунлик ўт очишни тўхтатиш режимига рози бўлиш ҳам муҳокама қилинмоқда.
“Бироқ бу борада якуний қарор ҳали қабул қилинмаган ва Трамп янги санкциялар жорий этишдан бош тортиши мумкин”, дея давом этади нашр.
Шу билан бирга, WSJ манбаларининг қайд этишича, Трамп Украинада тинчликка эришиш бўйича музокаралардан чарчаган ва агар сўнгги уринишлар самарасиз бўлса, ундан бутунлай воз кечиш ҳақида ўйламоқда. Журналистларнинг таъкидлашича, агар АҚШ бу саъй-ҳаракатлардан воз кечса, нима бўлади ва Трамп бу ҳолатда Украинага ҳарбий ёрдам беришда давом этадими ёки йўқми, каби саволлар очиқ қолмоқда.
Нашр эслатишича, 25 май куни Трамп Россияга қарши санкцияларни кучайтириш имкониятини аниқ кўриб чиқаётганини айтган. У Путинни танқид қилиб, унга нима бўлганини тушунмаслигини айтди.
“Мен уни анчадан бери биламан, доим у билан тил топишиб юрганман, лекин у шаҳарларга ракеталар учириб, одамларни ўлдиради, бу менга умуман ёқмайди”, деганди Америка Президенти Россиянинг Украина шаҳарларига янги оммавий зарбаларидан кейин.
“The Wall Street Journal” нашрига кўра, бу “АҚШ ва Россия ўртасидаги муносабатларнинг сўнгги ойларда ҳам кўтарилиш ва пасайишларни бошидан кечирган янги ёмонлашувидир”. Оқ уйга қайтган Дональд Трамп Путин билан мустаҳкам шахсий муносабатлари туфайли икки давлат ўртасидаги муносабатларни яхшилаш учун ўзига хос мавқега эга эканига ишонди.
“У Россия Президентини яхши билишига ва Трампга илтифот сифатида урушни тугатишига ишончи комил эди. Дональд Трампнинг фикри ўтган ҳафта Путин билан бўлиб ўтган телефон суҳбатидан сўнг ўзгара бошлади, бунда Кремль раҳбари Украинада ўт очишни тўхтатишга тайёр эмаслигини очиқ айтди”, деб ёзади нашр.
АҚШнинг Украинадаги собиқ элчиси Уильям Тейлорнинг сўзларига кўра, Трампнинг 25 майдаги изоҳлари у Путиннинг кимлигини аниқлашга ҳаракат қилаётганини кўрсатади.
“Трамп тинч йўл билан ҳал қилиш йўлидаги тўсиқ Путин деган хулосага келаётганга ўхшайди ёки аллақачон шундай хулосага келган”, дея қўшимча қилди Тейлор.
25 майга ўтар кечаси Россия қўшинлари 300 та ҳужумчи дрон ва 70 га яқин турли турдаги ракеталар, жумладан, баллистик ракеталар ёрдамида зарбалар берди. “Reuters” хабарига кўра, бу Украинада кенг кўламли уруш бошланганидан бери Украина шаҳарларига қилинган энг йирик ҳаво ҳужумидир. Россия зарбаси оқибатида камида 12 киши ҳалок бўлди.
