Трамп Россияга берган муддатини қисқартирмоқчи (видео)

АҚШ Президенти Дональд Трамп Россия Президенти Владимир Путиндан жуда ҳафсаласи пир бўлганини билдириб, Украина бўйича можарони ҳал қилиш учун илгари белгиланган ультиматум муддатини қисқартиришини эълон қилди. Бу ҳақда бугун, 28 июль куни Оқ уй раҳбари Буюк Британия Бош вазири Кир Стармер билан Шотландиядаги учрашувида сўз очди.

Қайд этилишича, Трамп Россиянинг жавобини олдиндан билгани учун ҳам шундай чорани қўллашга мажбур бўлган. 

“Мен Россияга берган 50 кунлик муддатни қисқартирмоқчиман, чунки уларнинг менинг шартимга қандай жавоб беришини аллақачон биламан”, деган Трамп. 

Президент Трамп Россияга қўйилган ультиматум айнан қанча вақтга қисқартирилганини очиқламаган. 

Маълумот учун, жорий йилнинг 14 июль куни Трамп Россиядан норози эканини билдирган ва агар 50 кун ичида Украина билан музокараларда ижобий силжиш бўлмаса, Москва ва унинг савдо ҳамкорларига 100 фоизгача иккиламчи божлар жорий этилишини эълон қилганди. Шунингдек, у Украинага янги қурол етказиб бериш ваъда қилган, бу харажатни эса, унинг айтишича, Европа Иттифоқи мамлакатлари қоплайди.

Кремль Трампнинг бу баёнотларини жиддий деб атаган ва уларни таҳлил қилиш зарурлигини билдирган. Президент матбуот котиби Дмитрий Песковга кўра, Украина АҚШнинг бу қарорларини урушни давом эттиришга туртки сифатида қабул қилмоқда.

Эслатиб ўтамиз, аввалроқ Россия Президенти Владимир Путин Ғарб тинчлик ўрнатиш учун қўйган шартларни инобатга олган ҳолда Москва билан ўзаро муносабатларни бошламагунча Украинадаги урушни тўхтатмоқчи эмаслиги ҳақида хабар берилганди.