Трамп Путинга “бир неча ҳафта” муҳлат берганини айтди

north_east

Трамп Путинга қизил гилам тўшади. Улар ниҳоят бирга

АҚШ Президенти Дональд Трамп Россия Президенти Владимир Путинга Россия–Украина тинчлик жараёни масаласида аниқ чоралар кўриш учун “бир неча ҳафта” муҳлат берганини маълум қилди. Бу ҳақда у кеча, 22 август куни Оқ уйда 2026 йилги футбол бўйича жаҳон чемпионатига бағишланган тадбир доирасида журналистларга айтиб ўтди.

Трамп Россия–Украина урушидаги кўплаб жиҳатлардан норозилигини билдириб, Россия Президентинa “тезроқ ва аниқроқ қадамлар ташлашга” чақирди. АҚШ Президенти, шунингдек, Украина ҳудудидаги америкаликлар корхонасига қилинган авиаҳужум ҳақида ҳам фикр билдирди.

“Мен Путинга айтдимки, бу мени қониқтирмайди. Мен бундан хурсанд эмасман, умуман бу урушда мени хурсанд қиладиган ҳеч нарса йўқ. Нима бўлишини кўрамиз. Ўйлайманки, келаси икки ҳафта ичида воқеалар қандай ривожланишини биламиз”, деди у.

Трамп Россия Президентига тинчлик жараёнини муҳокама қилиш учун “бир-икки ҳафта” берганини таъкидлаб, шу муддат ичида Россия–Украина музокаралари бўлиб ўтиши-ўтмаслигини диққат билан кузатишини, шундан кейин эса тегишли қарор қабул қилишини билдирди.

“Шунда мен биз нима қилишимизни ҳал қиламан. Аслида, бу жуда муҳим қарор бўлади. Яъни – бу қаттиқ санкциялар (Россияга нисбатан), қаттиқ тарифлар ёки иккаласи биргаликда бўлиши мумкин. Ёки биз умуман ҳеч нарса қилмаймиз ва шунчаки: “Бу – сизнинг урушингиз”, деймиз”, деди у.

АҚШ Президенти яна бир бор Россия ва Украина иштирокида икки томонлама учрашув зарурлигини таъкидлаб, зарурат бўлса, унда шахсан иштирок этишга тайёрлигини қўшимча қилди.

Эслатиб ўтамиз, кеча, 22 август куни Россия Президенти Владимир Путин Саровдаги “ёпиқ шаҳар” ядро марказида атом соҳаси корхоналари ходимлари билан учрашувда АҚШ Президенти Дональд Трампнинг лидерлик сифатлари Россия АҚШ билан муносабатларни тиклаши учун яхши гаров ҳисобланишини айтганди.