Трамп Путин ва Зеленский учрашиши мумкинлигини эълон қилди

north_east

Трамп Зеленскийга хавфсизлик кафолатини ваъда берди

АҚШ ва Россия Президентлари – Дональд Трамп ва Владимир Путин ўртасидаги Аляскадаги саммитдан сўнг Украинани тинч йўл билан тартибга солишни муҳокама қилиш учун навбатдаги учрашув Кремль раҳбари ва Украина Президенти Владимир Зеленскийнинг учрашуви ёки Путин, Зеленский ва Трампнинг учрашуви бўлиши мумкин. Бу ҳақда Дональд Трампнинг ўзи кеча, 13 август куни Европанинг қатор давлат ва ҳукумат раҳбарлари, шунингдек, шу мақсадда Берлинга борган Владимир Зеленский билан ёпиқ видеоконференция орқали мулоқот қилганидан кўп ўтмай маълум қилди.

Оқ уй раҳбарининг сўзларига кўра, бу учрашув яқин орада бўлиб ўтиши мумкин, бироқ 15 август куни Путин ва Трампнинг Аляскадаги музокаралари муваффақиятли ўтиши шарти билан.

Ўз навбатида, “Reuters” агентлиги манбаларга таяниб, “Европа ва Яқин Шарқдаги шаҳарлар” Украинадаги вазиятни тинч йўл билан тартибга солиш бўйича янги учрашув ўтказиш мумкин бўлган жой сифатида кўрилаётганини ёзди.

Шу билан бирга, Дональд Трамп агар Владимир Путин 15 август куни у билан учрашувдан сўнг Россиянинг Украинага қарши урушини тўхтатмаса, Москва “жуда оғир оқибатларга” дуч келишидан огоҳлантирди.

“Associated Press” агентлигининг хабар беришича, АҚШ Президенти Вашингтондаги Кеннеди марказидаги маросимдан сўнг матбуот вакиллари саволларига жавоб берар экан, бу ҳақда шундай баёнот берган. Бироқ у бу “оғир оқибатлар” қандай бўлишига аниқлик киритмаган.

Аввалроқ, Путин ва Трампнинг Аляскадаги учрашуви олдидан позицияларни мувофиқлаштириш мақсадида Трамп, Европа етакчилари ва Владимир Зеленский билан ёпиқ видеоконференция ташкил қилган Германия канцлери Фридрих Мерц АҚШ Президенти Россия ва Украина ўртасида ўт очишни тўхтатиш бўйича келишувга эришишни ўзининг устувор йўналишларидан бирига айлантириш ниятида эканини айтди.

Франция Президенти Эммануэль Макрон ҳам ўз мамлакатида алоҳида баёнот бериб, худди шу нарсани таъкидлади. Унинг сўзларига кўра, Трамп Путин билан учрашувда ўт очишни тўхтатишга эришмоқчи эканини “жуда аниқ кўрсатган”.

Ўз навбатида, Владимир Зеленский Берлинда Мерц билан қўшма матбуот анжуманида зудлик билан ўт очишни тўхтатиш Аляскадаги саммитнинг “марказий мавзуси”га айланишига умид билдирди. Шу билан бирга, у Путин “аниқ тинчликни истамаслигини” таъкидлаб, Ғарб иттифоқдошларини натижа бўлмаганда Россияга қарши санкцияларни кучайтиришга чақирди.