Трамп NBA финалида ҳуштакбозликка учради (видео)

Кеча, 9 июнь куни АҚШ Президенти Дональд Трамп NBA финал серияси доирасида бўлиб ўтган “Нью-Йорк Никс” ва “Сан-Антонио Спёрс” ўртасидаги учрашувда мухлисларнинг норозилигига дуч келди. Бу ҳақда “Associated Press” хабар берди.

Маълум қилинишича, ўйин олдидан АҚШ давлат мадҳияси янграётган вақтда Трампнинг сурати спорт залдаги катта экранларда намойиш этилган. Шу пайтда трибуналардан ҳуштакбозлик ва норозилик овозлари эшитилган.

Шу билан бирга, қўшиқчи Эйвери Уильсон мадҳияни ижро этаётган вақтда аренада “USA! USA!” шиорлари ҳам янграган. Маълумотларга кўра, экранларда Америка байроғи пайдо бўлганидан кейин ҳуштакбозликлар тўхтаган.

Учрашувда “Нью-Йорк Никс” ўз майдонида “Сан-Антонио Спёрс”га 111:115 ҳисобида мағлуб бўлди. Шунга қарамай, етти ўйиндан иборат финал сериясида “Никс” 2:1 ҳисобида олдинда бормоқда. Сериянинг тўртинчи ўйини жорий йилнинг 11 июнь куни яна Нью-Йоркда бўлиб ўтади.

Трамп баҳсни “Никс” клуби эгаси Жеймс Доланнинг ложасидан туриб кузатган. У билан бирга набираси Кай Трамп, шахсий маслаҳатчиси Борис Эпштейн ҳамда Вазирлар Маҳкамаси аъзолари Ли Зелдин, Шон Даффи ва Даг Бургум ҳам ўйинни томоша қилган.

Қайд этилишича, Дональд Трамп NBA финали плей-офф ўйинига ташриф буюрган илк амалдаги АҚШ Президенти сифатида тарихга кирди.