Трамп Қатар Бош вазири билан учрашди

АҚШ Президенти Дональд Трамп кеча, 12 сентябрь куни Қатар Бош вазири ва Ташқи ишлар вазири Муҳаммад бин Абдулраҳмон Ол Соний билан учрашди. Бу ҳақда Оқ уй вакили журналистларга маълум қилди. 

Америка етакчисининг пресс-пулидан олинган хабарга кўра, “Оқ уй Президент Трамп режалаштирилганидек Қатар Бош вазири билан бирга овқатланганини тасдиқлаган”. Бироқ учрашувда нималар муҳокама қилинганига аниқлик киритилмаган.

Вашингтон маъмурияти Трамп ва унинг тинчлик миссиялари бўйича махсус вакили Стивен Уиткофф 12 сентябрь куни Қатар Бош вазири билан учрашишини маълум қилганди. 

Американинг “Politico” газетаси 11 сентябрь куни Қатар Бош вазири Нью-Йорк ва Вашингтонга ташриф буюриб, Трамп, Уиткофф, АҚШ вице-президенти Жеймс Дэвид Вэнс ва Давлат котиби Марко Рубио билан учрашиши ҳақида хабар берди. Нашрнинг қайд этишича, томонлар Исроилнинг Доҳага берган зарбасини, шунингдек, Ғазо секторидаги ҳарбий ҳаракатларни тўхтатиш бўйича музокараларни муҳокама қилади.