Трамп Исроилга борди

Бугун, 13 октябрь куни эрталаб АҚШ Президенти Дональд Трамп гаровдагиларни озод қилиш жараёни давом этаётган бир пайтда Исроилга етиб борди. Тель-Авивдаги Бен-Гурион аэропорти уни тантанали кутиб олишди.

Air Force One самолёти Бен-Гурион аэропортига қўнаётганида учоқ ичидаги йўловчилар Тель-Авив соҳилидаги катта “рахмат” (Thank You) ёзувини кўришди.

Бен-Гурион аэропортида катта Исроил делегацияси – Бош вазир Биньямин Нетаньяху ва унинг рафиқаси Сара бошчилигида – президентни кутиб олди. Шунингдек, Исроил Президенти Ицҳок Герцог, АҚШнинг Исроилдаги элчиси Майк Ҳаккаби ва оташкесим битимини тузишда ёрдам берган Трампнинг куёви Жаред Кушнер ҳам ўша ерда эди. Унга Иванка Трамп ҳамроҳлик қилди.

Трамп Исроил Бош вазири Биньямин Нетаньяхуни самимий бағрига босиб, табассум билан қаршилади. Икки лидер сўнгги ойларда бир қанча тортишувларга қарамай, мураккаб муносабатларни сақлаб қолган.

Миср Президенти Абдул Фаттоҳ ас-Сиси дунёда тинчлик саъй-ҳаракатларини қўллаб-қувватлагани, можароларни юмшатгани ва Ғазодаги урушни тўхтатишда етакчилик қилгани учун Трампга Нил Ордени – мамлакатнинг энг юқори фуқаролик мукофотини топширади.

Исроил Президенти Ицҳок Герцог эса Трампга Исроилнинг энг олий фуқаролик мукофоти – Президент Шараф Медалини берилишини маълум қилди. Герцог таъкидлашича, Трамп “Яқин Шарқда хавфсизлик, ҳамкорлик ва тинчликка умид бошланишининг пойдеворини қўйган”.

Исроил Бош вазири Биньямин Нетаньяху АҚШ Президенти Дональд Трамп билан президент лимузинида бирга Қуддусга, Кнессет биносига йўл олди. Улар ҳаво майдонидан чиқишдан аввал машина ичида суҳбатлашгани кўринди.

Трамп ўтган ҳафтадаги гаровдагилар эвазига отишкесим келишувини қабул қилишга Нетаньяхуни қаттиқ босим билан кўндирган эди, аммо олдинда яна оғир музокаралар бўлиши мумкин.

Нетаньяху кеча “ҳарбий кампания якунланмади” деб огоҳлантирган бўлса, Трамп Air Force One бортида мутлақ бошқача фикр билдирди:

“Уруш тугади. Уруш тугади, тушунаяпсизми?” деди у журналистларга.