Трамп, Гренландиядан қўлингни торт – Дания

Дания Ташқи ишлар вазири Ларс Лекке Расмуссен АҚШ Президенти Дональд Трампни Гренландияга “қўл теккизмасликка” чақирди. Вазирнинг бу ҳақдаги сўзларини “Bloomberg” нашри келтирди.

Унинг таъкидлашича, АҚШ томонидан оролга қилинган ҳар қандай ҳужум бутун Дания қироллигига қилинган ҳужум сифатида қабул қилинади. 

Расмуссен Дания АҚШнинг Гренландияни топшириш ҳақидаги талабларига бўйсунмаслигини айтиб, Трампнинг позициясига изоҳ бериш учун АҚШ элчисини ТИВга чақирганини маълум қилган.

“Қиролликнинг бир қисмига қилинган ҳужум – бутун қиролликка қилинган ҳужумдир”, деган ТИВ раҳбари. 

Шунингдек, Расмуссен Гренландия НАТО ҳимояси остида эканини ҳам таъкидлаган. 

Гренландия Бош вазири Йенс-Фредерик Нильсен ҳам оролни АҚШга топшириш эҳтимолини рад этган. 

“Гренландия гренландияликларга тегишли ва унинг ҳудудий яхлитлиги ҳурмат қилиниши керак”, деган Йенс-Фредерик Нильсен. 

Эслатиб ўтамиз, 22 декабрь куни Трамп Луизиана штати губернатори, республикачи Жефф Лендрини Гренландия бўйича махсус вакил этиб тайинлаганини эълон қилган эди. Лендри тайинлов учун Трампга миннатдорлик билдириб, АҚШнинг оролни сотиб олиш ниятини тасдиқлаган. Кейинчалик Трамп Гренландия АҚШга табиий ресурслар учун эмас, балки миллий хавфсизликни таъминлаш мақсадида зарур эканини айтган. Йенс-Фредерик эса АҚШнинг оролни эгаллаш истагидан афсус билдирган.