Трамп Эрондан уранни олиб чиқиб кетмоқчи

АҚШ Президенти Дональд Трамп Эрон ҳудудидан тахминан 450 кг уранни олиб чиқиш бўйича ҳарбий операцияни амалга ошириш имкониятини кўриб чиқмоқда. Бу ҳақда “The Wall Street Journal” хабар берди.

Нашрнинг ёзишича, бундай миссия мураккаб ва хавфли бўлади, чунки АҚШ ҳарбийлари Эрон ҳудудида бир неча кун ёки ундан кўпроқ вақт қолишига тўғри келади. Бу эса америкалик аскарларни тўғридан тўғри хавф остига қўяди.

Манбаларга кўра, Трамп ҳали якуний қарор қабул қилмаган ва АҚШ ҳарбийлари учун хавфларни баҳоламоқда. Шу билан бирга, у бу ғояга умуман қарши эмас, чунки бу орқали у асосий мақсадига – Эроннинг ҳеч қачон ядро қуроли яратишига йўл қўймасликка эришишни истайди.

Газета манбасининг айтишича, Трамп ўз маслаҳатчиларига Эронни уранни келишув асосида топширишга мажбур қилиш учун босим ўтказишни ҳам тавсия қилган.

“Пентагон вазифаси – бош қўмондон учун максимал ҳаракат эркинлигини таъминлайдиган тарзда тайёргарлик кўришдир. Бу президент қарор қабул қилди дегани эмас”, деган Оқ уй матбуот котиби Кэролайн Ливитт.

Пентагон вазиятга изоҳ беришдан бош тортган. АҚШ Марказий қўмондонлиги ҳам изоҳ бермаган.

Аввалроқ, ОАВ Вашингтон Эрон ҳудудидан уранни олиб чиқиш учун махсус кучларни юбориши мумкинлиги ҳақида ёзганди. Гап кенг кўламли операция ҳақида эмас, балки кичик рейдлар ҳақида кетмоқда.

Бу ерда юқори даражада бойитилган уран назарда тутилмоқда. Теҳроннинг таъкидлашича, ўтган ёзда Исроил ва АҚШ томонидан Эрон ядро объектларига берилган зарбалардан сўнг бу уран иншоотлар вайроналари остида қолиб кетган.

Эслатиб ўтамиз, аввалроқ АҚШ Президенти Дональд Трамп операциялар натижасида Эрон режими аллақачон ўзгаргани ва янги раҳбарлар тайинланганини айтганди.