Трамп дунё давлатларини Ҳормузни очишга ёрдам беришга чақирди

АҚШ Президенти Дональд Трамп Эроннинг ҳарбий салоҳияти тўлиқ йўқ қилинганини маълум қилди, бироқ мамлакат ҳали ҳам кемалар қатновига нуқтали зарбалар беришга қодирлигидан огоҳлантирди. Бу ҳақда у бугун, 14 март куни Truth Social ижтимоий тармоғидаги саҳифасида ёзди.

У жаҳон етакчиларини Ҳормуз бўғозини қўриқлашда иштирок этишга чақирган. Шунингдек, Америка етакчиси Хитой, Буюк Британия, Франция, Япония ва Жанубий Кореяга мурожаат қилиб, ушбу стратегик сув йўлида биргаликда патруллик қилиш учун ҳарбий кемаларини юборишга ундаган.

“Кўплаб давлатлар, айниқса, Эроннинг Ҳормуз бўғозини ёпишга уриниши таъсир кўрсатадиган давлатлар бўғоз очиқ ва хавфсиз қолиши учун АҚШ билан биргаликда ҳарбий кемаларини юборади”, дейди Трамп.

Унинг сўзларига кўра, Теҳроннинг асосий кучлари тор-мор этилган ва раҳбарияти “тўлиқ бошсизлантирилган” бўлса-да, кичик қўпорувчилик ҳаракатлари хавфи сақланиб қолмоқда: Эронга “битта-иккита дрон юбориш, ракета учириш ёки сув йўли бўйлаб мина ўрнатиш жуда осон”.

АҚШ Президенти Вашингтоннинг минтақани узил-кесил барқарорлаштириш борасидаги қатъиятини тасдиқлаган.

“Қўшма Штатлар қирғоқ чизиғини шиддат билан бомбардимон қилади ва Эрон қайиқлари ҳамда кемаларини мунтазам равишда йўқ қилади. Нима бўлганда ҳам биз тез орада Ҳормуз бўғозини очиқ, хавфсиз ва эркин қиламиз”, дея хулоса қилган у.

“The Wall Street Journal” маълумотларига кўра, Трамп урушни дарҳол тўхтатишни режалаштирмаяпти ва Эрон ҳарбий ҳамда прокси-кучларига зарбаларни давом эттиришни талаб қилмоқда. Пентагон вакиллари нашрга можаро яна камида бир неча ҳафта давом этиши мумкинлигини билдирган.

WSJ қайд этишича, уруш бошланишидан аввал Штаб бошлиқлари бирлашган қўмитаси раиси генерал Дэн Кейн Трампни ҳужум Эронни Ҳормуз бўғозини ёпишга ундаши мумкинлигидан огоҳлантирган. Трамп бу хавфни тан олган, аммо Теҳрон бўғозни ёпишдан олдин таслим бўлади, деган ишонч билан операцияга қарор қилган. Икки ҳафта ўтгач, Эрон раҳбарлари ортга чекинишдан бош тортмоқда, бўғоз эса Теҳрон учун асосий босим дастагига айланган.

Эслатиб ўтамиз, аввалроқ G7 етакчилари Трампни урушни имкон қадар тезроқ тўхтатишга чақириб, Ҳормуз бўғози хавфсизлигини таъминлаш зарурлигини алоҳида қайд этгани ҳақида хабар берилган эди.