Трамп бугун Путин билан гаплашмоқчи

north_east

Трамп ва Путиннинг учрашувигина натижа беради – Рубио

АҚШ Президенти Дональд Трамп бугун, 19 май куни Россия етакчиси Владимир Путин билан Украинадаги урушни ҳал қилиш масаласини муҳокама қилиш учун телефон орқали мулоқот қилишни режалаштиряпти. Бу ҳақда у ўзининг Truth Social ижтимоий тармоғида ёзди.

“Россия Президенти Владимир Путин билан душанба куни соат 10:00 да (Тошкент вақти билан 19:00) телефон орқали қўнғироқ қиламан. Қўнғироқ мавзуси қон тўкилишини тўхтатиш бўлади”, деб ёзди Трамп. 

Трамп Путин билан Украинадаги вазият ва савдо масалаларини муҳокама қилишни режалаштирмоқда. Шундан сўнг у Украина Президенти Владимир Зеленский ва НАТО иттифоқчиларига қўнғироқ қилишга тайёр.

Россия Президенти матбуот котиби Дмитрий Песков Трамп ва Путин ўртасидаги учрашувга тайёргарлик кўриш ва у самарали бўлиши кераклигини айтган эди. Кремль вакилининг аниқлик киритишича, музокаралар Россия-Америка муносабатлари нуқтаи назаридан ҳам, халқаро ва минтақавий муаммоларни муҳокама қилиш нуқтаи назаридан ҳам зарур.

Шу куни Трамп Путин билан учрашиш қарори икки-уч ҳафта ичида қабул қилиниши мумкинлигини айтди. Шунингдек, у бу даврда “дунё анча хавфсизроқ бўлишини” таъкидлади.

Эслатиб ўтамиз, АҚШ Президенти Дональд Трамп ўзининг иккинчи президентлик муддати бошланганидан бери Путин билан икки марта – 12 февраль ва 18 март кунлари суҳбатлашганди. Икки ҳолатда ҳам асосий мавзу – Украинадаги можарони дипломатик йўл билан ҳал қилиш бўлган.