Трамп билан можародаги Испания Бош вазири ЖЧ финалига боради

Испания Бош вазири Педро Санчес АҚШ Президенти Дональд Трамп билан мудофаа харажатлари бўйича келишмовчиликларга қарамай, Испания ва Аргентина ўртасидаги Жаҳон чемпионати финалини томоша қилиш учун Нью-Йоркка боради. Бу ҳақда RTVE хабар берди.

Нашр маълумотига кўра, ўтган ҳафта Анқарада бўлиб ўтган НАТО саммитида Трамп Вашингтон энди Испания билан савдо қилишни истамаслигини билдириб, мамлакатни “ютқазилган ҳолат” ва НАТОдаги “ёмон шерик” деб атаган.

Манбаларга таянган ҳолда телеканал Педро Санчес 2026 йилги FIFA Жаҳон чемпионати финалида Аргентинага қарши баҳс олиб борадиган Испания терма жамоасини қўллаб-қувватлаш учун Нью-Йоркка ташриф буюришини маълум қилди.

Санчесга Испания Спорт вазири Милагрос Толон ҳамроҳлик қилади. Шунингдек, финал учрашувини Испания қироли Фелипе VI, қиролича Летисия, тахт вориси малика Леонор ва Инфанта София ҳам стадиондан туриб кузатиши кутилмоқда.

Қайд этиш жоиз, сўнгги ойларда Мадрид ва Вашингтон ўртасида мудофаа харажатлари бўйича келишмовчиликлар давом этмоқда. Санчес мудофаа учун ажратиладиган маблағни ЯИМнинг 5 фоизигача ошириш зарурлигини бир неча бор рад этган бўлса, Трамп Испаниянинг бу позициясини кескин танқид қилиб келмоқда.

Маълумот учун, Испания терма жамоаси ярим финалда Францияни 2:0 ҳисобида мағлуб этиб, финалга йўл олди. Энди жамоа ҳал қилувчи баҳсда Аргентинага қарши майдонга тушади. Испания 2010 йилдаги чемпионликдан сўнг иккинчи марта жаҳон чемпиони бўлиш имкониятига эга.