Трамп Байден имзолаган ҳужжатларни бекор қилди

АҚШ Президенти Дональд Трамп ўзидан олдинги раҳбар Жо Байден автопен (автоматлаштирилган имзо қўйиш қурилмаси) ёрдамида имзолаган барча буйруқ ва ҳужжатларнинг бекор қилинишини эълон қилди. Бу ҳақда у Truth Social'даги саҳифасида маълум қилди.

“Уйқучи Жо Байден томонидан автопен билан имзоланган ҳар қандай ҳужжат бекор қилинади ва бундан буён ҳеч қандай кучга эга эмас”, деди Трамп. 

Унинг айтишича, бундай қурилма фақат “АҚШ Президентининг аниқ рухсати” билан ишлатилиши мумкин. 

“Жо Байден автопен жараёнида иштирок этмаган. Агар у аксини айтса, унга ёлғон гувоҳлик берганлик бўйича айблов қўйилади”, деди Трамп.

Бунга жавобан Байден аввалроқ қарорларни оғзаки маъқуллаганини, кўп сонли ҳужжатлар сабаб ёрдамчилари автопенни ишлатганини тушунтирган.

Трампнинг таъкидлашича, автопен орқали имзоланган ҳужжатлар Байден давридаги барча ҳужжатларнинг тахминан 92 фоизини ташкил этади. Жорий йил март ойида Трамп Байден имзолаган айрим афв ҳужжатларини “ҳақиқий эмас”, деб эълон қилган, чунки уларнинг мазмунидан “Байденнинг ўзи бехабар бўлганини” иддао қилган эди.

Маълумот ўрнида, жорий йил июнь ойи бошида “Reuters” агентлиги Адлия вазирлиги Байденнинг ҳужжатларни имзолаш ваколатлари ва ходимлари томонидан автопеннинг ноқонуний ишлатгани-ишлатилмаганини ўрганиш бўйича тергов бошлаганини хабар қилган. 

Эслатиб ўтамиз, аввалроқ Трамп айрим божларни бекор қилгани ҳақида хабар берилганди. Трамп 200 дан ортиқ маҳсулотларга, жумладан, қаҳва, мол гўшти, банан ва апельсин шарбатига жорий этган оширилган божларни бекор қилганди. Бу қарор АҚШ аҳолиси орасида озиқ-овқат нархининг ошаётгани туфайли кучайган хавотирлар фонида қабул қилинган.