Трамп ашаддий душмани бўлмиш Мадуро билан гаплашди – ОАВ

Ўтган ҳафтада АҚШ Президенти Дональд Трамп ва Венесуэла Президенти Николас Мадуро телефон орқали гаплашди. Бу ҳақда ўз манбаларига таяниб, “New York Times” хабар берди.

Хабарда айтилишича, суҳбат ҳафта охирида, АҚШ Давлат котиби Марко Рубио иштирокида бўлиб ўтган. Суҳбат якунида ўртага АҚШда учрашиш масаласи кўндаланг қўйилган, аммо етакчилар учрашувини ўтказиш бўйича келишувга эришолмаган. 

Телефон суҳбати Давлат департаментининг “хорижий террористик ташкилот” деб эълон қилиш ҳақидаги қарори кучга киришидан бир неча кун олдин бўлиб ўтган. Гап “Қуёшлар картели” (Cartel de los Soles) ҳақида кетмоқда. АҚШ ушбу картелни Мадуро билан боғлайди. Каракас эса бунга жавобан АҚШни “ёлғон”да айблаган ва бундай картелнинг ўзи мавжуд эмаслигини билдирган. 

Бунгача “Axios” Трампнинг кескинлик ортиб бораётгани фонида Мадуро билан гаплашиш режаси ҳақида хабар берган эди. Манбаларнинг фикрича, бундай қарор АҚШнинг Венесуэлага ракета зарбалари ёки қуруқликдаги ҳарбий амалиётлари муқаррар эмаслигини англатиши мумкин.

“Қуёшлар картели” нима?

“Қуёшлар картели” (Cartel de los Soles) – АҚШ ҳуқуқ-тартибот органлари, журналистлар ва тадқиқот марказлари томонидан кўп йиллардан бери ишлатиладиган норасмий атама. У Венесуэладаги юқори мартабали амалдорлар ва ҳарбийлар орасида наркотрафик билан шуғулланишда гумон қилинаётган тармоқни англатса, ном эса генераллар елкасидаги қуёш шаклидаги юлдузлардан олинган.

2005 йилда Венесуэла собиқ президенти Уго Чавес ҳукумати АҚШ Наркотикларга қарши кураш бошқармаси билан ҳамкорликни тўхтатган. Шундан бери АҚШ мунтазам равишда венесуэлалик ҳарбий ва фуқаролик амалдорларига нисбатан санкциялар жорий қилиб келади.

2020 йилнинг баҳорида АҚШ Адлия вазирлиги Мадуро ва бошқа юқори мартабали амалдорларни “наркотерроризм”да айблаб, Мадурони ҳибсга олишга ёрдам бериши мумкин бўлган маълумот учун 15 миллион доллар мукофот эълон қилган. 2025 йил июль ойида мукофот 50 миллион долларга оширилган.

АҚШнинг Кариб денгизидаги ҳарбий фаоллиги

АҚШ Венесуэла етакчиси билан алоқаларни давом эттираётган бўлса-да, Кариб ҳавзасидаги ҳарбий мавжудлигини кучайтиришда давом этмоқда. 2025 йилнинг август ойида Трамп Америка ҳарбийларига Лотин Америкаси наркокартелларига қарши куч ишлатишга рухсат берган. 

Ёз охирига келиб Венесуэла соҳилига АҚШ Ҳарбий-денгиз кучларининг флотилияси етиб келган. У десант кемалари гуруҳи ва учта эсминецдан иборат бўлган.

Трамп, шунингдек, Венесуэла ҳудудига зарба беришга тайёр эканини, бу наркотик оқимини тўхтатиш учун зарурлигини айтган. Мадуро эса бунга жавобан Венесуэла Ҳарбий-ҳаво кучларини “мамлакатни ҳимоя қилишга тайёр туришга” чақирган ва унинг айтишича, венесуэлаликларнинг 82 фоизи “қурол билан юртини ҳимоя қилишга тайёр”.

Эслатиб ўтамиз, ушбу вазият фонида Мадуро Путиндан ёрдам сўраб хат йўллагани ҳақида хабар берилганди. Хатда Венесуэла етакчиси Россиядан мамлакатга ракеталар ва маблағ беришни, шунингдек, самолётларни таъмирлашни сўраган.