Трамп АҚШ терма жамоаси ўйинига чипта сотиб олишдан бош тортди

АҚШ Президенти Дональд Трамп АҚШ терма жамоасининг Жаҳон чемпионатидаги биринчи ўйинига 1000 долларлик чипта сотиб олмаслигини маълум қилди. Бу ҳақда у “The New York Post” нашрига берган интервьюсида сўз очди.

Аввалроқ, Европа футбол мухлислари ассоциацияси (FSE) чипта нархларини “товламачилик” деб атаб, савдони дарҳол тўхтатишга чақирган ҳамда FIFA’ни “ножўя нарх сиёсати”да айблаган. Кейинчалик ОАВ хабарларига кўра, 2026 йилги Жаҳон чемпионати финали чипталари нархи 10 990 долларгача етган. АҚШ терма жамоасининг 12 июнь куни Инглвуд шаҳрида Парагвайга қарши ўйнайдиган очилиш учрашуви учун энг арзон чипта 1079 долларни ташкил этади.

“Мен бу нархларни билмасдим. Ўша ўйинда бўлишни жуда хоҳлардим, лекин очиғи, бундай пул тўламасдим. Нархларни кўриб чиқишим керак. Агар Куинс, Бруклин ва мени қўллаб-қувватлайдиган одамлар стадионга кира олмаса, бу мени хафа қилади. Лекин шу билан бирга, бу катта муваффақият. Менга овоз берган одамлар ўйинга боришини хоҳлайман”, дейди Трамп.

Маълумот учун, 2026 йилги Жаҳон чемпионатида илк бор 48 та терма жамоа иштирок этади. Турнир тарихда биринчи марта АҚШ, Канада ва Мексика каби уч давлатда ўтказилади.

Эслатиб ўтамиз, аввалроқ FIFA президенти Жанни Инфантино Жаҳон чемпионати финалига 2 миллион долларлик чипта сотиб олган мухлисларга ҳазил аралаш тарзда ҳот-дог ва бир шиша кола совға қилишини айтганди.