Трамп 2 куркани афв этди. АҚШда Шукроналик куни қандай ўтади?

Америка Қўшма Штатларидаги энг муҳим ва қадимий байрамлардан бири – Шукроналик куни (Thanksgiving Day) ҳар йили ноябрь ойининг тўртинчи пайшанбасида нишонланади. Бу кун асрлар давомида оилавий қадриятлар, меҳр, бирдамлик ва мўл-кўлчилик тимсоли сифатида қадрланади.

Шукроналик байрамининг тарихи XVII асрга бориб тақалади. 1621 йилда Шимолий Америкага кўчиб келган европалик “пилоримлар” маҳаллий аҳоли – ҳиндулар билан бирга ҳосил йиғими шарафига умумий зиёфат уюштирган.

Бу дастурхон ўша даврда Яратганга шукрона қилиш, табиат баракаси учун миннатдорлик билдириш ва дўстлик рамзи сифатида нишонланган. Айнан шу анъана кейинчалик Америка тарихига чуқур сингиб, бугунги замонавий Шукроналик байрамининг асосига айланган.

1941 йилда АҚШ Конгресси “Thanksgiving”ни расмий миллий байрам сифатида эълон қилди. Шу кундан бошлаб ҳар йили мамлакатда энг қизиқарли ва ўзига хос маросимлар ўтказилади.

Байрам куни, “National Thanksgiving Turkey Pardon” деб аталадиган маросимда Президент икки куркани афв этади. Афв этилган куркалар махсус фермаларда роҳат-фароғатда умр ўтказади. Қолган куркалар бўлса, байрам дастурхонинг тансиқ таомига айланади.

Шукроналик куни бутун Америка бўйлаб кўтаринки руҳда ўтади. Бу кунда оилалар бир дастурхон атрофида жамланиб, узоқдан келган қариндошлар билан учрашади. Ҳисоб-китобларга кўра, ҳар йили 45–50 миллион америкалик айнан шу кунларда яқинларини кўриш учун сафарга чиқади.

Шукроналик кунида диний маросимлар ва шукроналик ибодатлари амалга оширилади, етим, мискин ва ночор одамларга таомлар ва турли ҳадъялар улашилади. 

Шу куни яна дунёга машҳур New York Macy’s Шукроналик паради бўлиб ўтади. Улкан ҳаво шарлари, рангли кўнгилочар машиналар, мусиқа ва шоулар билан безатилган парадни миллионлаб одам томоша қилади. 

Дональд Трамп президентлик йилларида Шукроналик маросимларига ўзига хос, баъзан ҳазиломуз, баъзан эса дабдабали тарзда ёндашгани билан танилган. У Оқ Уйда ўтказиладиган курка афви маросимида кулгили нутқлар, ноодатий чиқишлар ва сиёсий ҳазиллар қилишни хуш кўради.

Шунингдек, у ўзи афв этган куркаларнинг исмларини эслаб қолгани билан фахрланади. Бу йил 25 ноябрь куни Президент Гоббль ва Уаддль исмли куркаларни афв этди.

Комила Қобилова