Tojikistonda folbinlik uchun jinoiy javobgarlik joriy etildi

Tojikiston Jinoyat kodeksiga jodugarlik va fol ochish uchun modda kiritildi. Bu haqda mamlakat parlamentining rasmiy nashri “Sadoi mardum” xabar berdi.

Xabarda aytilishicha, yangi 240-modda (“Jodugarlik va fol ochish”) bo‘yicha jinoiy javobgarlik, agar ushbu harakatlar xuddi shunday huquqbuzarlik uchun ma’muriy jazo qo‘llanilgan kundan boshlab bir yil ichida sodir etilgan bo‘lsa, yuzaga keladi. Biroq, ushbu moddada qanday jazo nazarda tutilgani aytilmagan.

Shuningdek, matnda Ma’muriy javobgarlik to‘g‘risidagi kodeksdagi shunga o‘xshash moddani qayta ko‘rib chiqish haqida so‘z boradi: endi jarima miqdori oshirildi va muqobil jazo sifatida ma’muriy qamoq jazosi nazarda tutilgan. Biroq deputatlar jarima miqdori yoki qamoq muddatini ham ochiqlamagan.

“Asia-Plus”ning aniqlik kiritishicha, avvalroq jodugarlik uchun ma’muriy modda bo‘yicha jarima 2880 dan 3600 somoniygacha (264 dollardan 330 dollargacha) bo‘lgan. Yil davomida qoidabuzarliklar takrorlangan taqdirda jarima miqdori 4320 dan 7200 somoniygacha (396 dollardan 660 dollargacha) oshgan.
 
Ta’kidlanishicha, Tojikiston Jinoyat kodeksining 2023 yil noyabridagi holatiga ko‘ra, 240-modda boshqa nomga ega edi – “Qimorxonalar, o‘yin stollari va pul yutuqli mashinalarni tashkil etish yoki ularga xizmat ko‘rsatish”.

Tojikiston rasmiylari bu yil jodugarlarga qarshi kurash e’lon qildi. Respublika Ichki ishlar vazirligi aprel oyida tabiblar va sehrgarlar 6 oygacha majburiy mehnatga majburlanishini xabar berdi. Huquq-tartibot idoralariga ko‘ra, buning sababi "ba’zi xurofotchilarning ongining pastligi va bu noinsof fuqarolar tomonidan suiiste’mol qilinishi". Shu munosabat bilan ko‘proq tojikistonliklar firibgarlar qurboniga aylanmoqda.