Тошкентда қарийб 600 млнлик “свет” ўғрилари ушланди

Тошкент шаҳрининг Олмазор туманида ва Тошкент вилоятининг Қибрай тумани ҳамда Охангарон шаҳрида жами ярим миллиард сўмдан кўпроқ электр энергиясини талон-тарож қилганлар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар қилди.

Хабарда айтилишича, Департаментнинг Қибрай туманида ўтказилган терговга қадар текширувида “Z.S.” МЧЖ масъул шахслари “Узумзор” МФЙ ҳудудидаги биносида электр тармоғига ўзбошимчалик билан уланиб, 279,7 миллион сўмлик электр энергиясидан ноқонуний фойдаланганликлари аниқланган.

Шу билан бирга, Оҳангарон шаҳридаги “P.P.” МЧЖнинг “Бирлик” МФЙ ҳудудидаги қурилиши тугалланмаган биносида электр тармоғига ўзбошимчалик билан уланиб, 180,5 миллион сўмлик электр энергиясидан ноқонуний фойдаланганлиги аниқланган.

Департаментнинг Тошкент шаҳар Олмазор тумани бўлими томонидан ўтказилган терговга қадар текширувда эса, фуқаро Б.С. “Чилтуғон” МФЙ ҳудудидаги умумий овқатланиш шохобчасида умумий фойдаланишдаги электр тармоғига ўзбошимчалик билан тўғридан-тўғри уланиб, 111,9 миллион сўмлик электр энергиясидан ноқонуний фойдаланганлиги фош этилган.

Билдирилишича, мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Жиззахда 3,1 миллиард сўмлик электр энергиясини талон-тарож қилганлар қўлга олинган эди.