Тошкент шаҳар ИИББ “Бахти Ташкентский” бўйича мурожаат билан чиқди

Тошкент шаҳар Ички ишлар бош бошқармаси фуқароларга мурожаат билан чиқиб, тезкор тадбирлар давомида қўлга олинган Бахтиёр Зафарович Қудратуллаев (“Бахти Ташкентский”), Дилшод Тулкинович Шарипов ва Анвар Бабаражабович Мирзахановнинг жиноий хатти-ҳаракатлари бўйича маълумотларга эга бўлганлардан пойтахт ИИББга мурожаат қилишларини сўради.

“Ҳурматли фуқаролар агар Сиз ушбу шахслардан ёки гуруҳ аъзоларидан жабр кўрган бўлсангиз ёки ушбу шахсларнинг жиноий хатти-ҳаракатлари бўйича маълумотларга эга бўлсангиз, Тошкент шаҳар ИИББнинг 71-206-45-69, 71-206-49-46 ёки 102 рақамларига ёхуд 99-370-73-94 телеграм рақамига мурожаат қилишингизни сўраймиз”, дейилади хабарда. 

Қайд этилишича, мурожаатчининг шахси сир сақланиши кафолатланади.

Эслатиб ўтамиз, кеча, 3 декабрь куни Тошкент шаҳар ИИББ Тергов бошқармаси томонидан Жиноят кодексининг 165-моддаси 3-қисми (жуда кўп миқдорда товламачилик) билан қўзғатилган жиноят иши тергов қилинаётгани, мазкур жиноят иши доирасида ўтказилган тергов-тезкор ҳаракатлари давомида жиноий фаолият олиб борган бир нечта шахслар гумонланиб ушланганини маълум қилганди. 

Жумладан:

•    1971 йилда туғилган Бахтиёр Зафарович Қудратуллаев (165-модда 3-қисми, жуда кўп миқдорда товламачилик; 276-модда 2-қисми, кўп миқдорда гиёҳвандлик воситаларини сақлаш);

•    1980 йилда туғилган Дилшод Тулкинович Шарипов (165-модда 3-қисми, жуда кўп миқдорда товламачилик);

•    1972 йилда туғилган Анвар Бабаражабович Мирзаханов (165-модда 3-қисми, жуда кўп миқдорда товламачилик) қўлга олинган. 

“Ушбу шахслар таҳдид ва куч ишлатиш йўли билан пул маблағларини қонунга ҳилоф равишда қўлга киритиш билан шуғулланган”, дейилган ИИББ хабарида.