TikTok’нинг “мияси” ўзгармоқда

TikTok эгаси ByteDance энди NVIDIA чипларини сотиб олмайди. АҚШнинг экспорт чекловлари сабабли компания ўзининг махсус “ақлли” чипини яратишни бошлади. Бу ҳақда “Reuters” хабар берди.

Маълумотларга кўра, мазкур чиплар Samsung Electronics билан ҳамкорликда ишлаб чиқилмоқда. Samsung нафақат чип ишлаб чиқаради, балки тезкор ва юқори самарали хотира чипларига ҳам эга. Лойиҳа ички доираларда “SeedChip” код номи билан юритилмоқда ва ByteDance’нинг видео тавсиялар алгоритмлари ҳамда Doubao каби чат-ботларини янада ақлли қилиш учун махсус лабораторияда ишлаб чиқилмоқда.

Шунингдек, жорий йилнинг март ойида илк намуна чиплар тайёр бўлиши кутилмоқда, йил охиригача эса камида 100 минг дона чип ишлаб чиқарилиши режалаштирилган. Кейинчалик уларнинг сони босқичма-босқич 350 минг донага етказилиши кутилмоқда.

ByteDance 2026 йилда cунъий интелект технологиялари ва харидлари учун рекорд даражада 160 миллиард юань (22 миллиард доллар) сарфлашни режалаштирмоқда, бунинг ярми ҳали ҳам NVIDIA чипларига йўналтирилади.

Эслатиб ўтамиз, аввалроқ TikTok АҚШда америкалик инвесторлар назоратига ўтгани ҳақида хабар берилган эди.

Фарангиз Суннатова