Терма жамоа ичида “каламуш” бор – Каннаваро

Ўзбекистон миллий терма жамоаси бош мураббийи Фабио Каннаваро хорижлик мураббий бўлгани учун у ҳақида нотўғри маълумотлар тарқалгани ва терма жамоада шундай маълумотларни тарқатган “каламуш” борлигини айтди. Бу ҳақда Каннаваро Жоҳон чемпионати якунларига бағишланган матбуот анжуманида сўз очди.

Анжуманда ОАВ вакилларининг саволларига жавоб берар экан, италиялик мутахассис йиллик 4 миллион евро маош олаётгани ҳақидаги маълумотларни яна бир бор рад этди.

“Яна айтаман, мен бунча пул олмайман. Кимдир яна нотўғри маълумот тарқатяпти. Нега бундай бўлаётганини билмайман. Балки хорижлик мураббий бўлганим учун шундай бўлаётгандир, балки терма жамоа ичида “каламуш” бўлгани учун шундай бўлгандир”, дейди Каннаваро.

Шунингдек, бош мураббийнинг таъкидлашича, у мураббийлар штабидаги айрим мутахассисларнинг маошини ҳам шахсан ўзи тўламоқда.

“ЎФА билан тузилган шартномамга кўра, ўзим билан олиб келган мураббийларга ҳам чўнтагимдан маош тўлайман. Роландо Бьянки умуман текинга келиб, Ўзбекистон миллий терма жамоасида ишлашга рози бўлди. Агар биз яна янги мураббийларни жалб қилаётган бўлсак, бу уларга ЎФА маош тўлаяпти, дегани эмас. Уларни ўз маблағим ҳисобидан олиб келяпман”, дея қўшимча қилди Каннаваро.

Матбуот анжумани давомида Каннаваро терма жамоа атрофида тарқалаётган айрим маълумотларга ва унга бўлган танқидларга тўхталар экан, қайта ва қайта “балки хорижлик мураббий бўлганим учун шундай бўлаётгандир” дея таъкидлади.