Тайваннинг мустақиллигини тан олиб бўлмайди – Си Цзиньпин

Тайвань мустақиллиги ва минтақавий тинчлик бир-бирига мос келмайди. Бу ҳақда бугун, 14 май куни Хитой Халқ Республикаси Раиси Си Цзиньпин Пекинда АҚШ Президенти Дональд Трамп билан бўлиб ўтган учрашув чоғида айтиб ўтди.

Си Цзиньпин Тайвань атрофидаги вазият ҳақида гапирар экан, Тайвань суверенитети остида барқарор тинчлик ўрнатишнинг имкони йўқлигини айтди. У ҳудуд масаласи Хитой-АҚШ муносабатларидаги энг асосий ва нозик мавзулардан бири бўлиб қолаётганини қайд этган.

Пекин расмийлари Тайванни Хитой Халқ Республикасининг ажралмас қисми деб билишини яна бир бор эслатиб, “ягона Хитой” тамойилига риоя қилиш бошқа давлатлар учун муҳим шарт эканини билдирган. Хитой томони АҚШнинг Тайбэйга қурол сотишини икки давлат ўртасидаги энг мураккаб масалалардан бири сифатида кўришини ҳам таъкидлаган.

Учрашув Пекиндаги Халқ йиғинлари залида бўлиб ўтган ва икки соатдан ортиқ давом этган. Томонлар савдо, хавфсизлик ва глобал рақобат масалаларини муҳокама қилган.

Си Цзиньпин Хитой ва АҚШ ўртасида умумий манфаатлар уларнинг келишмовчиликларидан устун эканини, ҳамкорликни кенгайтириш эса икки давлат учун ҳам муҳим эканини таъкидлаган. У савдо урушлари ҳеч бир томонга фойда бермаслигини айтиб, “Фукидид тузоғи”дан эҳтиёт бўлишга чақирган.

АҚШ Президенти Дональд Трамп эса Вашингтон Хитой билан ўзаро тенглик асосида ҳамкорлик қилишга тайёр эканини билдирган. У музокараларга бир нечта йирик америкалик тадбиркорлар ҳам қўшилганини айтган.

Шунингдек, Оқ уй раҳбари Хитойга сўнгги тўққиз йил ичидаги илк ташрифини амалга ошираётгани ҳам қайд этилган.

Зарнигор Худойбердиева