Ташиевнинг тарафдори озодликка чиқарилди

Қирғизистон Миллий хавфсизлик давлат қўмитаси собиқ раҳбари Қамчибек Ташиевнинг тарафдори ва яқин дўсти Нурғози Анорқулов тергов ҳибсхонасидан озод қилинди. Бу ҳақда Бишкек шаҳар Биринчи май туман судига тачниб, “Kaktus.media” хабар берди.

Аниқлик киритилишича, жорий йилнинг 7 апрель куни тергов хизмати терговчиси Нурғози Анорқуловга нисбатан эҳтиёт чорасини ўзгартириш бўйича илтимоснома билан мурожаат қилган ва у туман суди томонидан қаноатлантирилган.

Нурғози Анорқулов тергов ҳибсхонасидан озод қилиниб, 2026 йилнинг 10 июнига қадар уй қамоғига ўтказилган. У оммавий тартибсизликлар моддаси бўйича айбланмоқда.

Эслатиб ўтамиз, Нурғози Анорқулов жорий йилнинг 17 февраль куни Қозоғистон билан чегарада, Қирғизистонга кириб келаётган пайтда қўлга олинган эди. Бундан ташқари, 2021 йил январь ойида Қирғизистон Президенти аппарати ахборот сиёсати бўлими мудири лавозимида ишлаган Нурғози Анорқулов МХДҚ томонидан жуда йирик миқдорда пора талаб қилишда ҳам гумонланиб ушланган. Тергов талқинига кўра, у хизмат мавқеидан фойдаланиб, юқори давлат лавозимига даъвогар шахсдан тайинловда ёрдам бериш эвазига пул талаб қилган, шундан сўнг эгаллаб турган лавозимидан озод этилган эди. Бир мунча вақт ўтгач, у уй қамоғига қўйиб юборилган.

Жорий йил 10 февраль куни Қирғизистон Президенти Садир Жапаров Қамчибек Ташиевни Миллий хавфсизлик давлат қўмитаси раиси лавозимидан озод қилган эди. Ўшандан бери МХДҚнинг бир қатор собиқ юқори мартабали раҳбарлари қўлга олинди, айримлари эса ишдан бўшатилди. Жўғўрқу Кенешнинг тўққиз нафар депутати, жумладан, Қамчибек Ташиевнинг укаси Шоирбек Ташиев мандатини топширди. Кейинроқ у “Қирғизнефтгаз” корхонаси фаолияти билан боғлиқ коррупция айблови билан ҳибсга олинди. Махсус хизматнинг собиқ раҳбари ҳозирча сўнгги воқеаларга изоҳ бергани йўқ.