Таиландда алкоголга қўйилган ярим асрлик тақиқ бекор қилинди

Таиландда тушлик вақтида алкоголь ичимликларини сотишни тақиқловчи ярим асрдан ортиқ амал қилган чеклов бекор қилинди. Бу ҳақда “Thansettakij” нашри хабар берди.

Ҳукумат 14:00 дан 17:00 гача алкоголь сотишга рухсат берган ва эскирган қонун нормаларини юмшатган. Ресторан эгаларига кўра, бу ўзгаришлар муассасаларнинг даромадини камида 20 фоизга ошириши мумкин.

Бошида бу чеклов “1972 йилги Инқилобий қўмита фармони” билан жорий этилган бўлиб, давлат хизматчиларининг иш вақти давомида алкоголь истеъмол қилмаслигини таъминлаш мақсадида ишлаб чиқилган эди. Бироқ ижтимоий-иқтисодий вазият сезиларли даражада ўзгарди. Таиланд дунё миқёсида туризм марказига айланди, ресторанлар эса сайёҳларга мўлжалланган хизмат кўрсатиш саноатининг муҳим сегменти бўлди.

Ўтган йилларда қатъий чекловлар сайёҳлардан шикоятлар ва хорижий ОАВда салбий мақолаларга сабаб бўлган. Бу ҳатто баъзи ташриф буюрувчиларни юқори мавсумда Таиландга келишдан тўсиб, уларни юмшоқроқ қоидалари бўлган бошқа давлатларни танлашга мажбур қилган.

Эслатиб ўтамиз, аввалроқ Қозоғистон Ички ишлар вазирлиги мамлакатда спиртли ичимликлар савдосига бир қатор чекловлар жорий этишни таклиф қилганди.