Сурияда ҳукумат кучлари ва курдлар ўртасида жанглар бошланди

Бугун, 7 январь куни Суриянинг Ҳалаб шаҳрида Сурия армияси ва Сурия Демократик кучлари (СДК) ўртасида ҳалокатли тўқнашувлар қайта бошланди. Минглаб тинч аҳоли қочиб кетган ва камида тўрт киши ҳалок бўлган. Бу ҳақда маҳаллий мухбирларга таяниб, “Reuters” хабар берди.

Келтирилишича, мамлакатда зўравонликлар ва уни ким бошлагани ҳақида айбловлар алмашинуви, марказий ҳукуматга қўшилишга қаршилик кўрсатган Дамашқ ва курд расмийлари ўртасидаги келишмовчилик чуқурлашиб, ҳалокатли оқибатларга олиб келган. Кеча, 6 январь куни Суриянинг шимолий Ҳалаб шаҳрида ҳукумат кучлари ва курд жангарилари ўртасидаги шиддатли жанглар бошланган.  

Икки кучнинг ўзаро отишмалари оқибатида камида олти киши, жумладан, икки аёл ва бир бола ҳалок бўлган. Ҳалаб соғлиқни сақлаш бошқармаси яна тўрт киши ҳалок бўлганини ва 18 киши яраланганини маълум қилган.

Сурия армияси СДФ назоратидаги Шайх Мақсуд ва Ашрафия маҳаллаларидаги ҳарбий позициялар "қонуний ҳарбий нишонлар" эканлигини эълон қилди. Сурия хавфсизлик хизматининг икки ходими Reuters агентлигига шаҳарда муҳим ҳарбий операция бўлишини кутишларини айтишди.

Ҳукумат тинч аҳолининг тўқнашувли ҳудудлардан қочиши учун гуманитар йўлакларни очиб берди ва уларни шаҳар автобусларида олиб кетди. Тахминан 10 000 киши қочиб кетган.

"Биз уларни хоҳишларига кўра хавфсиз тарзда боришни истаган жойларига ёки кўчирилган бошпаналарга кўчирамиз", деди Ҳалабдаги фуқаролик мудофааси кучларининг операциялар бошлиғи Файсал Муҳаммад Али.

Сўнгги жанглар Суриянинг етакчи шаҳарларидан бирида тинч аҳоли ҳаётини издан чиқарди, аэропорт ва Туркияга олиб борадиган автомагистрални ёпди, саноат зонасидаги фабрикаларда ишларни тўхтатди ва шаҳар марказига олиб борадиган асосий йўлларни тўсиб қўйди.

Дамашқ ҳукумати ўз кучлари СДК назоратидаги ҳудудлардан ракета зарбалари, дрон ҳужумлари ва ўққа тутилишларга жавоб бераётганини маълум қилган, аммо курд кучлари Дамашқни “минглаб тинч аҳолининг ҳаётига таҳдид соладиган ва шаҳардаги барқарорликка путур етказадиган хавфли эскалация учун тўлиқ ва бевосита жавобгар” деб ҳисоблашларини билдирган.

Ўтган йили Дамашқ ҳукумати СДК билан 2025 йил охирига қадар тўлиқ интеграцияни режалаштирган келишувга эришган, аммо икки томон ҳам деярли ҳеч қандай натижага эриша олмаган, ҳар бири бир-бирини тўхтатиб қўйганликда ёки ёмон ният билан ҳаракат қилганликда айблаган. 

Эслатиб ўтамиз, аввалроқ Туркия Сурия ҳарбийларини ўқитишни бошлагани ҳақида хабар берилганди.