Суд собиқ президентга ҳукм чиқарди

Бугун, 3 июнь куни Бишкек шаҳрининг Первомай туман суди Қирғизистоннинг собиқ президенти Алмазбек Атамбоевни сиртдан қамоқ жазосига ҳукм қилди. Бу ҳақда “Vesti.kg” хабар берди.

Маълум қилинишича, худди шу пайтнинг ўзида собиқ президент билан яна бир неча кишига ҳукм чиқарилган.

Нашрга кўра, суд жараёнида бир нечта эпизодлар кўриб чиқилган – 2019 август кунлари Қўй-Тош қишлоғида содир бўлган ҳодисалар, шунингдек, ўша қишлоқда ер участкаларини ноқонуний олиб қўйиш билан боғлиқ ҳолатлар.

Суд қарорига кўра, Алмазбек Атамбоев айбдор деб топилиб, 11 йил 6 ойлик қамоқ жазосига ҳукм қилинган. Суд, шунингдек, собиқ президентнинг мол-мулки ва унинг давлат мукофотларини мусодара қилишни буюрган.

Қолган судланувчилар 3 йилдан 7 йилгача муддатга ҳукм қилинди.

Атамбоевнинг ҳибсга олиниши

Қирғизистонга 2011-2017 йилларда раҳбарлик қилган Атамбоев 2019 йил 8 август куни Чуй вилоятининг Қўй-Тош қишлоғидаги қароргоҳида деярли бир кун давом этган махсус операция давомида қўлга олинган эди. Унга қўйилган барча айбловларни бир неча бор рад этган собиқ давлат раҳбарининг тарафдорлари қаршилик кўрсатган ва махсус бўлинманинг бир зобити операция давомида ҳалок бўлган. Тўқнашув вақтида 100 дан ортиқ одам, жумладан полициячилар тиббий ёрдам сўраб мурожаат қилган. 

Собиқ президент ҳибсга олинганидан бир неча кун ўтиб, ҳуқуқ-тартибот идоралари ходимларига нисбатан зўравонлик қўллаш, оммавий тартибсизликлар уюштириш, қотиллик, қотилликка уриниш, шунингдек, гаровга олишни ташкил этиш, Бишкек иссиқлик электр станциясини реконструкция қилишдаги коррупция, Бишкекдаги “Форум” саноат гуруҳи биноси билан ноқонуний битим тузиш, Қўй-Тош қишлоғи ва Иссиқкўл вилоятидаги ер участкаларини ноқонуний эгаллаб олиш айбловлари қўйилган. 

Собиқ давлат раҳбари 2020 йил ёзида 11 йилу 2 ойга қамоқ жазосига ҳукм қилинган эди. Кейинчалик Атамбоевга қўйилган баъзи айбловлар олиб ташланган, 2022 йил июнида эса у 2020 йил октябрь ойида Бишкекда оммавий тартибсизликлар уюштирганликда айбланиб, оқланган эди. 

Суд қарори билан 2023 йил 14 февралда 3,5 йил тартибли колонияда ўтирганидан сўнг озодликка чиқди ва республикани тарк этди. Собиқ президент озодликка чиққанидан кейин даволаниш учун Испанияга кетди. Ҳозирда ҳам у Қирғизистондан ташқарида.