Сотиб олинганига 4 кун бўлган 9 млн евролик яхта чўкиб кетди (видео)

Италиянинг Сардиния шаҳри қирғоқларида қиймати 9 миллион евродан ортиқ бўлган суперяхта янги эгасига топширилганидан бор-йўғи тўрт кун ўтиб ёнғин сабабли чўкиб кетди. Бу ҳақда “Il Messaggero” нашри хабар берди.

Хабар қилинишича, ҳодиса 30 метрлик Angiola II яхтаси билан юз берган. Воқеа Коста-Смеральда қирғоқларида, Порто-Черво яқинида содир бўлган. Бортда тўсатдан ёнғин чиққан ва орадан кўп ўтмай яхта сув остида қолган.

Энг муҳими, фожиа пайтида бортда бўлган барча 14 киши фавқулодда хизматлар томонидан эсон-омон қутқариб олинган. 

Angiola II янги эгасига ҳодисадан бор-йўғи тўрт кун аввал топширилган. Ёнғиндан жиддий зарар кўрган кемани кейинчалик шатакка олиб, қирғоққа етказиш режалаштирилган. Фавқулодда хизматлар маълумотига кўра, ҳодисадан сўнг денгизга ёқилғи сизиб чиқиши кузатилмаган.

Яхтани ишлаб чиқарган Amer Yachts компаниясининг маълум қилишича, Angiola II 2020 йилда сувга туширилган. Ўшандан бери у бир неча бор эгасини ўзгартирган.

Компания вакиллари кафолат муддати давомида яхтага техник хизмат кўрсатиш уларнинг назорати остида амалга оширилганини қайд этган.

“Йўловчилар ва экипаж аъзоларининг хавфсиз қолганидан хурсандмиз. Бошқалар қатори биз ҳам расмий тергов натижаларини кутмоқдамиз”, дейилади компания баёнотида.

Ҳозирда ёнғин сабабларини ва яхта нега шунчалик қисқа вақт ичида чўкиб кетганини аниқлаш бўйича тергов ҳаракатлари олиб борилмоқда.

Эслатиб ўтамиз, аввалроқ Мисрнинг Марса ал-Алам шаҳри яқинида Қизил денгиз қирғоғида бортида 45 киши бўлган сайёҳлик яхтаси ҳалокатга учраган эди.