Соболенко Индиан-Уэллс турнири чемпиони бўлди

Кеча, 15 март куни АҚШнинг Индиан-Уэллс шаҳрида ATP 1000 тоифасига кирувчи турнир финали бўлиб ўтди. Унда тўрт карра “Катта дубулға” турнири ғолиби ва дунёнинг биринчи рақамли теннисчиси Арина Соболенко ғалаба қозонди.

Финал учрашувида Соболенко қозоғистонлик икки карра йирик турнир ғолиби Елена Рибакинани 3/6, 6/3, 7/6 ҳисобида мағлуб этди.

Соболенко учун Индиан-Уэллсдаги ушбу ғалаба мавсумдаги иккинчи, фаолиятидаги эса 23-чемпионлик бўлди. Шунингдек, беларуслик теннисчи 1000 тоифасидаги турнирларда ўзининг 10-чемпионлигини қўлга киритди.

Жорий мавсумда у Австралия очиқ чемпионати финалига ҳам етиб борган, бироқ ҳал қилувчи баҳсда айнан Рибакинага 4/6, 6/4, 4/6 ҳисобида ютқазган эди.

Эндиликда ҳар икки теннисчи Маями шаҳрида ўтказиладиган аёллар теннис уюшмасининг 1000 тоифасига кирувчи турнирида иштирок этади. Соболенко ушбу мусобақанинг амалдаги чемпиони ҳисобланади.