Собиқ президентнинг рафиқаси коррупцияда айбдор деб топилди

Бугун, 28 январь куни Сеул марказий округ суди собиқ Жанубий Корея президенти Юн Сок Ёлнинг рафиқаси Ким Гон Хини коррупцияда айбдор деб топди. Бу ҳақда суд мажлисининг жонли эфирида маълум қилинди.

Сеул марказий округ судининг 27-жиноий бўлими 28 январь куни маҳаллий вақт билан соат 14:10 да ҳукм чиқариш бўйича суд мажлисини ўтказди. Мажлис якунида суд собиқ биринчи хонимни айбдор, деб эълон қилди.

Суд мажлиси жонли эфирда намойиш этилди. Бу Ким Гон Хига нисбатан чиқарилган биринчи суд ҳукми ва илк бор жонли эфирда кўрсатилган суд жараёни бўлди.

Маълумот учун, 2024 йил 3 декабрь куни ҳарбий ҳолат жорий этишга бўлган муваффақиятсиз уринишдан сўнг лавозимини тарк этган собиқ давлат раҳбари Юн Сок Ёлнинг рафиқаси Ким Гон Хи бир қатор оғир айбловлар билан судга тортилган эди. Хусусан, у Deutsche Motors автосалони акциялари билан боғлиқ фирибгарликда, бизнес манфаатлари эвазига Unification Church диний ташкилотидан қимматбаҳо совғалар – сумкалар ва заргарлик буюмларини қабул қилганликда, шунингдек, сайловлар вақтида жамоатчилик фикри сўровларини манипуляция қилишда айбланган.

2025 йил декабрь ойида махсус прокурор Мин Жун Ки бошчилигидаги тергов гуруҳи Ким Гон Хи учун 15 йил муддатга озодликдан маҳрум этиш жазосини сўраган эди.

Эслатиб ўтамиз, аввалроқ Жанубий Кореянинг собиқ президенти 5 йилга озодликдан маҳрум қилинган эди. У расмий ҳужжатларни сохталаштиришда ва ҳарбий ҳолат жорий этиш учун қонуний талабларга риоя қилмасликда айбдор деб топилган.