“Сизсиз нима қилишни билмайман”. Месси марҳум отасига таъсирли мактуб ёзди

Аргентина терма жамоаси ҳужумчиси ва сардори Лионель Месси ижтимоий тармоқда отаси Хорхе Месси билан хайрлашиб, унинг вафотидан сўнг футболчилик фаолиятини узоқроқ давом эттиришига шубҳа қилаётганини тан олди.

Хорхе Месси жорий йилнинг 8 август куни Росарио шаҳридаги шифохонада 68 ёшида вафот этди. Унинг дафн маросими 9 август куни ёпиқ тарзда ўтказилди.

“Сиз мендан ўтган Жаҳон чемпионатида ўйнашни жуда кўп илтимос қилардингиз. Турнир бошланишига бир неча кун қолганда ўзингизни ёмон ҳис қила бошладингиз. Биринчи марта мен билан турнирда бўлмадингиз. Онам эса сизни тузалиб, кела олишингизни айтарди.
Мен сизга финалга чиқишимизни, шунда кела олишингизни айтдим. Ҳар бир ўйиндан кейин сиздан хабар кутиб, сизни соғиндим. Ўша пайтда вазият жуда оғир эканини англадим.
Шунга қарамай, имкони борича узоқроқ боришни ва сизга ҳеч бўлмаса битта ўйинимни кўриш имконини беришни ўйладим. Биз финалга чиқдик, аммо сиз у ерда бўла олмадингиз. Мен сизга кубокни олиб келиш учун финалда ғалаба қозонишни хоҳладим. Аммо қила олмадим, оёқларим энди менга бўйсунмасди. Бу сафар танам билан курашишга ҳаракат қилдим, аммо уддалай олмадим”, деб ёзди Месси.

Унинг таъкидлашича, отаси билан Жаҳон чемпионати ҳақида тўлиқ гаплаша олмаган.

“Мен келганимда, сиз финалда пенальтилар сериясида мағлуб бўлганмиз, деб ўйлаган эдингиз. Биз содир бўлган воқеалар ҳақида гаплаша олмадик. Сиз ўйиндан завқлана олмадингиз. Биз чемпион бўлмадик, аммо ҳар бир ўйиндан қанчалик завқланганимизни тасаввур ҳам қила олмайсиз. Ҳар доимгидек, сиз ҳақ эдингиз – мен у ерда бўлиб, ўйнашим керак эди. Мен буни сизга айтаяпман, чунки бу биз гаплаша олмай қолган ягона масала. Қолган барча нарсани сиз аллақачон биласиз”, дея қўшимча қилган саккиз карра “Олтин тўп” соҳиби.

Месси отасисиз ҳаётини қандай давом эттиришни билмаётганини ҳам қайд этган.

“Сизсиз нима қилишни, ҳаётимни қандай давом эттиришни билмайман. Мен шунчаки футбол ўйнардим ва энди буни узоқроқ давом эттиришимга жиддий шубҳа қиламан. Сиз бошиданоқ ёнимда эдингиз ва охиригача ҳам оз қолганди. Нега бирга якунлашимиз учун яна бироз сабр қила олмадингиз?” деб ёзди аргентиналик футболчи.

Маълумот учун, 39 ёшли Месси Испания чемпионати, “Барселона” ва Аргентина терма жамоасининг энг яхши тўпурари ҳисобланади. У, шунингдек, тарихда саккиз марта “Олтин тўп”ни қўлга киритган ягона футболчи ҳисобланади.

Хорхе Месси эса ўғлининг манфаатларини ҳимоя қилиб, унинг футболчилик фаолиятини кўп йиллар давомида бошқариб келган.