Синнер Жоковични мағлуб этиб, “Уимблдон” финалига чиқди

Италиялик теннисчи Янник Синнер сербиялик Новак Жоковични мағлуб этиб, кетма-кет иккинчи марта “Уимблдон” турнири финалига йўл олди. Мусобақа Англия пойтахти Лондонда бўлиб ўтмоқда.

Учрашув дунёнинг биринчи рақамли теннисчиси Синнернинг 6/4, 6/4, 6/4 ҳисобидаги ишончли ғалабаси билан якунланди. Жокович эса мусобақада 7-рақам остида таснифланган эди.

Энди Синнер чемпионлик учун германиялик Александр Зверевга қарши кортга чиқади. Финал баҳси эртага, 12 июль куни бўлиб ўтади.

24 ёшли Янник Синнер ҳозирги кунда ATP рейтинги пешқадами ҳисобланади. У фаолияти давомида ATPнинг яккалик баҳсларида 29 та чемпионликни қўлга киритган. Италиялик теннисчи тўрт карра “Катта дубулға” турнири ғолиби бўлиб, “Австралия очиқ чемпионати”да икки марта (2024, 2025), “US Open”да бир марта (2024) ва “Уимблдон”да бир марта (2025) зафар қучган. Шунингдек, у Италия терма жамоаси билан 2023 ва 2024 йилларда Дэвис кубогини қўлга киритган.

39 ёшли Новак Жокович ATP рейтингида саккизинчи ўринни эгаллаб турибди. Сербиялик теннисчи фаолияти давомида ATP яккалик баҳсларида 101 та чемпионликни қўлга киритган. Шулардан 24 таси “Катта дубулға” турнирлари бўлиб, бу эркаклар яккалик баҳслари тарихидаги энг яхши натижа ҳисобланади. У 2024 йилги Олимпия ўйинлари чемпиони, 2008 йилги Олимпия ўйинлари бронза медали соҳиби ҳамда 2010 йилги Дэвис кубоги ғолибидир. Шунингдек, Жокович дунё биринчи рақамли теннисчиси сифатида 428 ҳафта ўтказгани билан ҳам рекорд ўрнатган.

Маълумот учун, “Уимблдон” мавсумнинг учинчи “Катта дубулға” турнири ҳисобланади. Мусобақа майса қопламали кортларда ўтказилади ва эртага, 12 июль куни якунланади. Турнирнинг умумий мукофот жамғармаси 64,2 миллион фунт стерлингни ташкил этади.