Си Цзиньпин Ўзбекистон билан муносабатларга алоҳида эътибор қаратишини айтди

Бугун, 24 июль куни Хитой раҳбари Си Цзиньпин Ўзбекистон Республикаси Президенти Шавкат Мирзиёевни туғилган куни муносабати билан табриклади. Бу ҳақда Президент матбуот котиби Шерзод Асадов хабар берди.

ХХР Раиси ўз табригида Хитой-Ўзбекистон муносабатларини ривожлантиришга алоҳида эътибор қаратиши ҳамда икки давлат ўртасида қарор топган амалий алоқалар ва дўстликни юксак қадрлашини айтган.

“Ҳурматли Президент жаноблари! Таваллуд кунингиз муносабати билан сизга самимий табрикларим ва энг эзгу тилакларимни изҳор этаман! Сизга мустаҳкам соғлик ва фаровонлик тилайман!” деган у.

Си Цзиньпин шунингдек, жорий йилнинг 17 июнь куни Қозоғистон пойтахти Остонадаги Мустақиллик саройида бўлиб ўтган “Марказий Осиё – Хитой” иккинчи саммитини эслаб, Хитой билан Ўзбекистон ўртасидаги ҳар қандай шароитда ҳам стратегик шериклик муносабатларини янги даврда ривожлантиришнинг стратегик йўналишлари белгилаб олинганини қайд этган.

“Шанхай ҳамкорлик ташкилотининг Тяньцзинь саммитида ҳамда Хитой халқининг япон босқинчиларига қарши урушидаги ғалабаси ва фашизмга қарши жаҳон урушидаги ғалабасининг 80 йиллигига бағишланган тантанали тадбирларда иштирок этаётганингиз муносабати билан сизни Хитойда қутлашдан мамнунман”, деган Хитой раҳбари.

Маълумот учун, бугун, 24 июль куни Ўзбекистон Президенти Шавкат Мирзиёев 68 ёшга тўлди. Шавкат Миромонович Мирзиёев 1957 йил 24 июлда Жиззах вилоятининг Зомин туманида шифокор оиласида туғилган. Миллати – ўзбек. Олий маълумотли, 1981 йили Тошкент ирригация ва қишлоқ хўжалигини механизациялаш муҳандислари институтини тугатган. Муҳандис-механик мутахассислигига эга. Техника фанлари номзоди, доцент.

Меҳнат фаолиятини 1981 йилда Тошкент ирригация ва қишлоқ хўжалигини механизациялаш муҳандислари институтида бошлаб, кичик илмий ходим, катта ўқитувчи, доцент, ўқув ишлари бўйича проректор лавозимларида ишлади. 1990 йили Республика Олий Совети депутатлигига сайланиб, айни вақтда Мандат комиссиясининг раиси сифатида ҳам фаолият кўрсатди. 1992 йилда Тошкент шаҳрининг Мирзо Улуғбек тумани ҳокими лавозимига тайинланди. 1996-2001 йилларда Жиззах вилояти ҳокими, 2001-2003 йиллар мобайнида Самарқанд вилояти ҳокими лавозимларида ишлаб, мазкур туман ва вилоятларни ижтимоий-иқтисодий жиҳатдан ривожлантиришга катта ҳисса қўшди.

Ижро ҳокимиятидаги фаолияти билан бир пайтда 1995-2003 йилларда Ўзбекистон Республикаси Олий Мажлисининг депутати сифатида ҳам мамлакатни сиёсий, ижтимоий-иқтисодий ривожлантириш ҳамда демократик ислоҳотларни амалга ошириш борасидаги муҳим қонун ҳужжатларини ишлаб чиқиш ва қабул қилиш жараёнида фаол иштирок этиб, самарали фаолият олиб борди.

Шавкат Мирзиёев 2003 йилда Ўзбекистон Республикасининг Бош вазири этиб тасдиқланди ва ушбу лавозимга яна уч марта – 2005, 2010, 2015 йилларда Олий Мажлис палаталари томонидан қайта тасдиқланди.

У 2016, 2021 ва 2023 йилларда бўлиб ўтган президент сайловларида ғалаба қозониб, Ўзбекистон Президенти этиб сайланди.

Эслатиб ўтамиз, аввалроқ Туркманистон Президенти Сердар Бердимуҳамедов ҳамда унинг отаси, Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедов Ўзбекистон раҳбарига табрик йўллаганди. Президент Путин эса ўз қутловида Президент Шавкат Мирзиёев икки мамлакат ўртасидаги кенг қамровли стратегик шериклик ва иттифоқчилик муносабатларини мустаҳкамлашга улкан ҳисса қўшаётганини таъкидлаган.