СИ спорт зал сайтини бузиб, навбат ўғирлади

Австралияда сунъий интеллект спорт залидаги онлайн брон қилиш тизимидаги заифликдан фойдаланиб, ўз эгасига машғулот учун жой олган. Бунинг учун СИ навбатдаги бошқа мижознинг бронини бекор қилган. Бу ҳақда “ABC News” хабар берди.  

Қайд этилишича, Эндрю исмли австралиялик фуқаро ўзининг Claude AI асосида ишловчи ёрдамчисидан машҳур эрталабки машғулотга жой банд қилишини сўраган. СИ спорт залидаги брон тизимидаги заифликни аниқлаб, машғулотга рухсат этилган муддатдан бир неча ой олдинроқ жой банд қилиш имконини топган.
Кейинчалик Эндрю машғулотга кутиш рўйхатида тўртинчи бўлиб турганини кўриб, СИдан уни рўйхатнинг бошига чиқариш мумкинми, деб сўраган. Шундан сўнг агент Эндрюдан олдинда турган бошқа мижозни кутиш рўйхатидан чиқариб юборган.

Энг эътиборлиси, Эндрю СИдан буни бекор қилишни сўраганида, агент бошқа мижозни қайта рўйхатга қўша олмаслигини билдирган. Кейинроқ у спорт залидаги дастурий таъминот провайдерига аниқланган заифлик ҳақида огоҳлантирувчи хат тайёрлаб берган.

Мазкур ҳолат СИ агентлари оддий топшириқни бажаришда фойдаланувчи аниқ сўрамаган ёки кутмаган ҳаракатларни ҳам амалга ошириши мумкинлигини кўрсатди. Мутахассисларнинг таъкидлашича, агент қанчалик автоном бўлса, унинг кутилмаган зарар етказиш эҳтимоли ҳам шунчалик юқори бўлади.

Маълумотларга кўра, СИ агентларининг имкониятлари сўнгги йилларда кескин ошган. 2020 йилда бундай тизимлар инсон учун тахминан 4 сонияда бажариладиган вазифаларни мустақил бажара олган бўлса, 2026 йилга келиб улар инсон учун қарийб 12 соат талаб қиладиган вазифаларни ҳам бажариш имкониятига эга бўлган.

Мутахассислар энди бундай ҳолатларда ким жавобгар бўлиши кераклиги масаласига ҳам эътибор қаратмоқда. Бу фойдаланувчи, СИ агентини ишлаб чиққан дастурчи ёки унинг асосидаги моделни яратган компания бўлиши мумкин. Амалдаги қонунчилик эса автоном СИ агентлари билан боғлиқ бундай ҳолатларни тўлиқ қамраб олмаган.

Эндрю эса воқеадан сўнг ҳам СИдан фойдаланишни тўхтатмаган. Унинг айтишича, ҳодиса унга сунъий интеллектдан масъулият билан фойдаланиш кераклиги ҳақида жиддий огоҳлантириш бўлган.

Эслатиб ўтамиз, аввалроқ Тайвань давлат идораларига хориждан сунъий интеллект ёрдамида киберҳужум уюштирилганини аниқланган эди.