Шифокорлар аёлнинг кўзидан қурт чиқариб олди

Россиянинг Омск шаҳрида шифокорлар бир аёлнинг кўзидан жонли паразитни олиб ташлади. Бу ҳақда ҳудудий Соғлиқни сақлаш вазирлиги хабар берди.

Қайд этилишича, бир бемор аёл тез тиббий ёрдам бўлимига қоши остида нимадир ҳаракат қилаётгандек ҳис қилгани учун мурожаат қилган. Офтальмолог текширув ўтказиб, унинг кўзи остидан жонли курт, яъни чумолига ўхшаш паразит чувалчангни топиб, дарҳол олиб ташлаган. Жараёндан сўнг аёлга инфекцион бўлимга мурожаат қилиш тавсия этилган.  

Маълум бўлишича, олинган паразит дирофилярия бўлиб, у касалланган ҳайвонлардан чивинлар орқали одамга юқади. Шифокорлар йилига ўртача уч-тўрт марта бундай паразитни олиб ташлайди.

Инсон танасида дирофилярия жинсий етуклик босқичига етмайди ва кўпаймайди, шу сабабли у атрофдагилар учун хавфли эмас. Шунга қарамай, паразитнинг катталашган шакли анча йирик бўлиши мумкин – у 15-18 сантиметр узунликка етади.

Эслатиб ўтамиз, аввалроқ Қозоғистоннинг Чимкент шаҳрида ўтказилган мураккаб жарроҳлик амалиётида 10 ёшли боланинг миясидан ўндан ортиқ қурт олиб ташланган эди.

Моҳичеҳра Қадамова