Шифокорлар адашиб беморнинг соғлом оёғини кесиб ташлади

АҚШнинг Оҳайо штатида шифокорлар саратон сабаб ампутация қилиниши керак бўлган ўнг оёқ ўрнига беморнинг соғлом чап оёғини кесиб ташлади. Бу ҳақда “Daily Mail” хабар берди.

Даъвога кўра, Шарон Жекс 2025 йилнинг сентябрь ойида саратон билан зарарланган ўнг оёғини тиззадан паст қисмидан ампутация қилдириш учун Селби умумий шифохонасига мурожаат қилган. Бироқ жарроҳлик амалиёти вақтида тиббиёт ходимлари унинг соғлом чап оёғини ампутация қилган. Шундан сўнг, Жекс иккала оёғидан ҳам айрилган.

Жекс ва унинг адвокати Бред Лейн томонидан судга 32 саҳифалик даъво аризаси киритилган. Унда жарроҳлик гуруҳи томонидан бемор хавфсизлигининг асосий талабларига риоя қилинмагани таъкидланган. Адвокатнинг айтишича, операция давомида хатони аниқлаш ва уни тўхтатиш учун бир нечта имконият бўлган, бироқ тиббиёт ходимлари нотўғри оёқда операция қилинаётганини пайқамаган.

“Бундай хато ҳеч қачон содир бўлмаслиги керак. Бунинг учун ҳеч қандай баҳона йўқ”, дея маълум қилган Лейн.

Унинг айтишича, бир нечта тиббиёт ходимларининг хатоси оқибатида Жекс умрининг қолган қисмида ушбу ҳолат билан яшашига тўғри келади. Ҳозирда Жекс шифокор ва тиббиёт муассасасига қарши суд орқали компенсация талаб қилмоқда. Иш бўйича якуний суд қарори ҳали чиқарилмаган.

Эслатиб ўтамиз, аввалроқ Туркияда шифокорлар беморнинг касалланган қулоғи ўрнига соғлом қулоғини операция қилгани ҳақида хабар берилган эди. Шунингдек, олдинроқ Фарғонада шифокор беморнинг чап оёғини кесиш ўрнига иккала оёғини ҳам кесиб, унинг ўлимига сабабчи бўлгани учун 4 йил озодликдан маҳрум қилинганди.