Шавкат Мирзиёев Япония Парламенти Маслаҳатчилари палатаси президенти билан учрашди

Бугун, 19 декабрь куни Ўзбекистон Республикаси Президенти Шавкат Мирзиёев Японияга расмий ташрифи доирасида ушбу мамлакат Парламентининг Маслахатчилар палатаси президенти Масаказу Сэкигучи билан учрашди. Бу ҳақда Президент матбуот хизмати хабар берди.

Қайд этилишича, учрашувда Ўзбекистон билан Япония ўртасидаги стратегик шериклик ва кўп қиррали ҳамкорликни ривожлантиришда парламентлар муҳим ўрин тутиши таъкидланган. Маслахатчилар палатаси вакиллари жорий йилнинг апрель ойида Тошкентда бўлиб ўтган Парламентлараро иттифоқнинг 150 йиллигига бағишланган сессияда фаол иштирок этган.

Ёшларнинг парламентга оид ташаббусларини қўллаб-қувватлаш, жумладан, Ўзбекистон – Япония ёшлар парламентлари аъзолари форумин ўтказиш ҳамда 2026 йилда Самарқандда бўлиб ўтадиган Ёшлар парламентлари аъзолари глобал конференциясида Япония делегациясининг иштирок этишига алоҳида эътибор қаратилган.

Парламентлар олий даражада эришилган, энг аввало, савдо-иқтисодий, молиявий, инвестициявий, технологик ва маданий ҳамкорликни кенгайтириш бўйича келишувларни амалга оширишга ҳар томонлама кўмаклашиши муҳимлиги таъкидланган.

Эслатиб ўтамиз, аввалроқ Мирзиёев Япония Императори билан учрашган эди.