Шавкат Мирзиёев Янги Тошкентдаги биринчи нимстанция билан танишди

Бугун, 30 декабрь куни Президент Шавкат Мирзиёев Янги Тошкент ҳудудида қурилаётган энергетика объектлари билан танишди. Бу ҳақда Ўзбекистон етакчисининг матбуот хизмати хабар берди.

Қайд этилишича, тригенерация технологияси шаҳарни марказлашган совитиш ва иситиш билан таъминлаш учун замонавий ечим бўлиб, анъанавий қувватларга нисбатан 2 бараваргача кам энергия сарфлайди. Оддий иссиқлик марказлари ёки совитиш тизимларида ишлаб чиқариш жараёнлари алоҳида-алоҳида амалга оширилади. Тригенерацияда эса буларнинг барчаси ягона технологик занжир асосида бирлаштирилади.

“Ҳозирги пайтда Янги Тошкентда айнан шу технологияга асосланган станциянинг асосий бино ва иншоотларининг қурилиши жадал кетмоқда. Лойиҳа доирасида талаб этиладиган асосий асбоб-ускуналар халқаро энергия самарадорлик талабларига тўла мос келади”, дейилади хабарда.

Билдирилишича, биринчи босқичда иссиқлик учун 75 мегаватт, совитиш тизими учун эса 100 мегаватт қувват яратилади. Шу билан бирга, 17 мегаватт миқдорда қўшимча электр энергияси ҳам ишлаб чиқарилади.

Президент Янги Тошкентнинг биринчи нимстанциясида олиб борилаётган ишлар билан ҳам танишган. Нимстанция қуввати 100 мегаваттга тенг бўлиб, Янги Тошкентнинг дастлабки босқичдаги эҳтиёжларини таъминлайди. Лойиҳа Хитойнинг “Haocheng Industry Group Limited” компанияси иштирокида давлат-хусусий шериклик асосида амалга оширилмоқда. Ушбу объект Ўзбекистондаги биринчи ёпиқ турдаги нимстанция ҳисобланади.

Қайд этилишича, бундай типдаги иншоотлар анъанавий очиқ нимстанцияларга нисбатан бир қатор устунликларга эга. Аввало, улар шаҳар ичидаги муҳитга мос лойиҳаланади ва ҳудуд архитектура қиёфасини бузмасдан жойлаштирилади. Шунингдек, бундай нимстанцияларнинг шовқин даражаси анъанавийларига қараганда икки баравар паст бўлади. Бундан ташқари, очиқ турдаги иншоотларга нисбатан уч баробар кам майдон талаб қилади. Бу янги қурилаётган Янги Тошкент каби мураккаб муҳандислик концепциясига эга шаҳарда жуда катта афзаллик ҳисобланади.

Президент мазкур объектлар билан танишар экан, уларнинг техник имкониятлари, иқтисодий самараси ва Янги Тошкент учун стратегик аҳамиятини алоҳида қайд этган. Лойиҳанинг янада самарали ишлаши ва келгусидаги босқичларини тез ҳамда сифатли амалга ошириш юзасидан ўз тавсияларини берган.

Эслатиб ўтамиз, аввалроқ Шавкат Мирзиёев Янги Тошкентдаги ерости автотураргоҳи ва пиёдалар ўтиш йўлагини барпо этиш ишларини кўздан кечирганди.